Тошкент шаҳар ИИББ пойтахтдаги ОТМлардан бирига қарашли қизлар ётоқхонаси олдида ахлоқсиз хатти-ҳаракатларни содир этган эркак бўйича маълумот берди.
Ижтимоий тармоқларда номаълум эркак кишининг жамиятда юриш-туриш қоидаларини бузгани акс этган видео тарқалиб, турли муҳокамаларга сабаб бўлмоқда. “Nemolchi.uz” лойиҳасининг ётоқхона қизларига таяниб ёзишича, бу каби ҳолат биринчи марта кузатилмаяпти.
Идоранинг маълум қилишича, 24 май куни тахминан соат 15:00 ларда Учтепа туманида жойлашган олийгоҳлардан бирининг қизлар учун мўлжалланган ётоқхонаси олдида, 1961 йилда туғилган З.Э. жамиятда юриш-туриш қоидаларини қасддан менсимасдан майда безорилик содир этган. Кўрилган чора-тадбирлар натижасида ушбу фуқаро ички ишлар органлари ходимлари томонидан ушланган.
Мазкур ҳолат юзасидан Учтепа тумани ИИО ФМБ томонидан фуқаро З.Э.га нисбатан Маъмурий жавобгарлик тўғрисидаги кодекснинг 183-моддаси (майда безорилик) билан маъмурий баённома расмийлаштирилган ҳамда Жиноят ишлари бўйича Учтепа туман суди томонидан унга нисбатан 15 сутка маъмурий қамоқ жазоси тайинланган.
Бундан олдин Тошкент вилояти Янгийўл туманида яшовчи 19 ёшли йигит 10 кун давомида вояга етмаган қизни бўш уйда сақлаб, уни ўзи билан жинсий алоқа қилишга мажбурлаб келгани маълум бўлганди. Йигит бутун жараённи видеотасвирга олган ва кейинроқ қизни ўзи билан яна ётиши учун шантаж қилиб келган.
Изоҳ (0)