Комик актёр, “Миллион” жамоаси аъзоси Ўткир Шодмонов “Дарё”нинг YouTube’даги каналига берган интервьюсида санъатга кириб келиши, отасининг муҳожирликда ишлашга мажбур бўлгани ва оиласи оғир шароитда яшагани ҳақида гапирди.
— Санъатга қизиқишим мактаб пайтидан бошланган десам муболаға бўлмайди. Тадбирларда ҳазиломуз саҳна кўринишлари билан иштирок этардим. Оиламизда санъаткорлар йўқ, фақатгина катта акам рассомчилик билан шуғулланади. Ота-онамнинг ўқишга имкони бўлмаган, улар тегирмонда ишлаб, ун чиқариб бозорда сотишган. Оилада беш ўғил ва бир қиз фарзандмиз. Уларнинг орасида фақатгина иккита акам ўқимаган, қолганларининг бари олий маълумотли. Отам-онам ўзлари ўқимай қийинчилик кўришгани учун болаларининг таълим олишига алоҳида эътибор беришган.
— Мактабни битириб, актёрлик бўйича ўқишимни айтганимда акам қаршилик қилган. Шундан кейин дирижёрлик бўйича таҳсил олганман. Коллежни тамомлаб, Самарқанд давлат университетининг мусиқа факультетига ўқишга кирганман. Акам “Санъаткор эмас, педагог бўласан”, деб кўп айтарди. Ҳақиқатан ҳам ҳозирги кунда ўзим таҳсил олган санъат коллежида дрижёрликдан дарс беряпман. Ойлик даромадим 3 миллион сўм, ишимни ва ўқувчиларимни яхши кўраман, — дейди Ўткир Шодмонов.
Ўткир Шодмонов қийинчиликда ўтган болалиги ҳақида сўзлаб берди.
— Қишлоғимизда учта шиферсиз уй бўлса, уларнинг биттаси бизники эди. Мактабдан қайтаётганда ёмғир ёки қор ёғса, ҳамма болалар хурсанд бўларди. Биз эса “Ёғмаса эди, уйимиз ҳам сувга тўлади”, деб келардик. Чунки ҳақиқатан ҳам уйимизнинг ҳамма ёғидан чакки ўтиб, совиб кетарди. Ота-онам олти болани энамнинг уйига олиб бориб, ўзлари уйда қолишарди. Касал бўлиб қолмасин деб хавотирланишарди-да. Кўп болали бўлгандан кейин барибир рўзғорда камчилик бўлади. Дадам рўзғорни тўлдириш учун бир неча йил Россияда муҳожир бўлиб ишлашга ҳам мажбур бўлган. Тўғриси, қийинчиликлар ҳақида унчалик гапиргим келмайди. Чунки бундай кунлар ҳамманинг бошидан ўтади. Шукрки, улғайганимиздан кейин қийин кунлар ортда қолди, — дейди Ўткир Шодмонов.
Ўткир Шодмонов қандай қилиб “Миллион” жамоасига қабул қилингани ҳақида гапирди.
— Университетнинг “Респект” жамоасига қабул қилишган. Жамоа билан “Қувноқлар ва зукколар” мусобақаларида иштирок этардик. Бир куни жамоамиз билан 1-октябрь Устоз ва мураббийлар кунига бағишлаб интермедия саҳналаштирганмиз. Уни Маъруф Носиров кўриб, унда илиқ таассурот қолдирган эканман.
Университетни тамомлагандан кейин Россия институтларининг бирига ҳужжат топширганман. Мен топширган факультет дефектология бўлиб, у ерни тамомлаганлар нуқсонли болалар билан ишлайдиган педагог бўлиб чиқарди. Энг қизиғи, имтиҳонда телефондан кўчириб саволларга жавоб берганман, аммо уни устозларга ҳимоя қилиб бериш ҳам керак экан. Аммо мен умуман рус тилини билмас эдим. “Тилни билмай туриб қандай ўқимоқчисан?” деганда йигитлардан таржимонлик қилиб беришини сўраганман. Энг қизиғи, санъаткор эканлигим ва бу соҳани ривожлантириш ниятим борлигини эшитиб, менга юқори балл қўйишган. Ўша йили 12 та ўзбек ҳужжат топширганди, шулардан фақатгина мен шартнома асосида ўқишга қабул қилинганман.
Пул тўлаб ўқимайман деб турганимда “Респект”даги жўраларимдан бири қўнғироқ қилиб, “Гараж” лойиҳасига таклиф этишаётгани ҳақида айтган. Қишлоққа қайтиб, тўрт кундан кейин Тошкентга сафар қилганман. Уйдагилар ҳам уришишмаган. Даврон Кабулов сёмка пайтида Тошкентда яшашимиз учун барча шароитларни яратиб берган. Моддий қийинчиликлар бўлмагани учун ҳам кўрсатувдан бемалол ижод қилганмиз, — дейди Ўткир Шодмонов.
Агар комик актёрни янада яқиндан билишни истасангиз, у билан бўлган суҳбатни тўлиқ ҳолда томоша қилинг.
Изоҳ (0)