АҚШ озиқ-овқат ва фармацевтика идораси (FDA) мия чипларини ишлаб чиқариш билан шуғулланадиган Neuralink компаниясига одамлар устида тадқиқот ўтказишга рухсат берди, деб ёзмоқда компания матбуот хизмати Twitter’да.
“Одамларда биринчи клиник синовимизни бошлаш учун FDA рухсатини олганимизни эълон қилишдан мамнунмиз! Бу, кун келиб технологиямиз кўплаб одамларга ёрдам беришига замин яратадиган илк муҳим қадамдир”, — дейилади Neuralink постида.
Компания клиник тадқиқотда иштирок этувчи одамларни йиғиш ҳали бошланмаганини таъкидлади, шунингдек, тафсилотларни кейинроқ тақдим этишга ваъда берди.
Компания асосчиси Илон Маск чипларни одамларда синаб кўриши ҳақида сўнгги йилларда бир неча бор эълон қилган, бироқ Neuralink FDA’дан 2022 йил бошига келибгина рухсат сўраган — ўшанда ариза рад этилган.
Раҳбариятнинг бундай қарорига чипларда тузатиш керак бўлган бир нечта нуқсонлар борлиги сабаб бўлган. Агентлик манбаларига кўра, асосий муаммолар батарея, мия ичида имплант симларнинг силжиши эҳтимоли ва қурилмани хавфсиз олиб ташлаш билан боғлиқ эди.
Илон Маск Neuralink’ни 2016 йилда яратган. 2019 йилда компания мияни компьютерга уловчи қурилмани тақдим этди. Илон Маск Neuralink’нинг асосий мақсади одамларга келажакда мия ва орқа мия жароҳатлари оқибатларини бартараф этиш имконини бериш учун мия-компьютер интерфейсини яратиш эканини айтади. Бундан ташқари, деб ёзади Reuters, Маск мия имплантлари турли муаммолар, жумладан, семизлик ва депрессиядан азият чекадиган одамларга ёрдам бериши мумкинлигига ишонади.
Изоҳ (0)