Республика ихтисослаштирилган кўз микрохирургияси илмий-амалий тиббиёт марказида халқаро миқёсда симпозиум бўлиб ўтди. Симпозиумда АҚШ, Буюк Британия, Швейцария ва Ўзбекистоннинг профессор олимлари ўзларининг илмий маърузалари билан иштирок этди.
Марказ директори Азамат Юсупов симпозиумнинг аввалги ўтказилган шу каби конгресслардан фарқли жиҳатларини санаб ўтди. “Ҳар йили марказ томонидан бундай кенг кўламли симпозиумлар ташкиллаштириб келинади. Аммо бу симпозиумнинг асосий фарқи — илмий-амалий маъруза шаклида ўтаётганидир. Симпозиумда энг сўнгги фундаментал маърузалар ўқиляпти. Бундай маърузаларни ташкил қилиш 5 йил олдин режа қилинади ва тайёргарлик бошланади. Илмий маърузаларни дунёнинг энг нуфузли клиника ва университетларида фаолият юритувчи таниқли профессорлар ўқийди. Бошқа вақтда тингловчи сифатида иштирок этиш учун эса ўша мамлакатга бориш, университетларида ўқиш ва маълум муддат стажировка ўташ керак. Ушбу симпозиум айнан шу жиҳатдан аҳамиятлидир”.
Симпозиумда британиялик профессор Гордон Плант неврология ва нейроoфтальмология йўналишларида қандай фундаментал текширувлар мавжудлиги ва соҳадаги сўнгги янгиликлар тўғрисидаги маърузаси билан қатнашди.
Яна бир британиялик профессор Линдон Да Круз регенератив тиббиёт хусусида маъруза ўқиди. Кўз тўр пардаси кўчириб ўтказиш амалиётини ўз ичига олган маърузада олим 20 йиллик тажрибаси билан бўлишди. Кўзнинг тўр пардасини муваффақиятли кўчириб ўтказиш бўйича 20 йил ичида қандай текширув ва тадқиқотлар ўтказилгани ҳақида маълумот берди.
“Кўз тўр пардасини кўчириб ўтказиш жарроҳлик амалиёти ниҳоятда мураккаб жараёндир. Тўр пардадан ташқари кўзнинг ҳамма қисмини трансплантация қила олардик. Бу ҳақиқий инқилобий амалий текширувдир. Маърузада тўр парда кўчириб ўтказилган иккита бемор 18 ой давомида тиббий кузатувда бўлгани айтилди. Илгари бу борада гап кетганда умуман иложи йўқ, дер эдик. Кўп йиллик илмий изланишлар натижасида бунинг имкони борлиги исботланди. Эндиликда ушбу лабораторияларнинг қандай ташкил этилгани, уларни Ўзбекистонда ҳам жорий этиш бўйича ўрганиш олиб боришни режа қилдик. Агар бу амалиёт мамлакатимизда ҳам қўллана бошланса, тўр парда билан боғлиқ касалликлари туфайли кўриш қобилиятидан маҳрум бўлган беморлар қайта кўриш имкониятини қўлга киритадилар”, — дейди марказ директори Азамат Юсупов.
Офтальмология соҳасида телетиббиёт, сунъий интеллект ва робот-офтальмологиянинг кўз касалликларини даволашда қўлланилиш ютуқлари хусусида америкалик профессор Линда Лем ўз маърузасини тушунтириб берди.
“Рақамли тиббиёт офталмольогия учун жуда муҳим, фақатгина телетиббиёт эмас, балки тасвирдаги муҳим хусусиятларни ташхислашда сунъий интеллектдан қандай фойдаланишимизнинг роли ортиб боради. Мисол учун бу Ўзбекистонда катта муаммо бўлган диабетга ташхис қўйиш имкониятига эга бўлиш, кўз тўр пардаси касалликларини аниқлаш, шунингдек, юрак-қон томир хавфи ва деменция каби хусусиятларни олдиндан ташхислаш сунъий интеллект ёрдамида башоратли моделлаштиришдан фойдаланишни ўз ичига олади. Дейлик, биз ретинал (кўз тўр пардаси) суратини кўриб чиқамиз ва бемор неча ёшда эканини, у эркак ёки аёлми ва уларда юрак касаллиги ёки ҳатто, дементия каби мия муаммоларининг қанчалик эҳтимоллиги борлигини аниқлашимиз мумкин. Мен робототехника жарроҳлик нуқтаи назаридан қандай рол ўйнаши ҳақида ҳам сўз юритмоқчиман. Роботлар бизга хавфсизроқ жарроҳлик амалиётини ўтказишда ёрдам бериши мумкин, чунки, масалан, жарроҳларда титроқ бор, роботлар эса титроқни тинчлантиришга ёрдам беради, шунда биз жарроҳликда ҳеч қандай ҳаракат қилмаймиз. Шунингдек, сунъий интеллект эрта ёшдаги чақалоқларда ретинопатия бор-йўқлигини аниқлашда, робототехника роли эса жарроҳликда тиббиётнинг ажралмас қисмига айланиб боради”.
Изоҳ (0)