Москва шаҳрида 13 йил олдин Ўзбекистонда содир этган жинояти учун халқаро қидирувда бўлган шахс қўлга олинди. Бу ҳақда Россия пойтахтининг Ички ишлар бош бошқармаси матбуот хизмати хабар берди.
Мавжуд маълумотларга кўра, ушбу шахс 2010 йилда ўзи билан бирга яшаб келган аёлни ўлдириб, унинг 7 минг доллар ва 5 миллион сўм пулини, шунингдек, жабрланувчининг мобил телефонини ўғирлаган ва Россия ҳудудида яширинган. Шу боис ҳолат юзасидан халқаро қидирув эълон қилинган.
Ўзбекистонда ҳолат юзасидан Жиноят кодексининг 97- (қасддан одам ўлдириш) ва 164-моддалари (босқинчилик) билан жиноят иши қўзғатилган.
Тезкор-қидирув тадбирлари давомида гумонланувчи Москва терговчилари томонидан Олмаота кўчасида ушланган. У ҳуқуқ-тартибот ходимларига сохта паспортни кўрсатган, аниқланишича, эркак ҳужжатдаги фотосуратни қайта ёпиштирган. Гумонланувчига нисбатан қамоққа олиш эҳтиёт чораси қўлланган ва у эндиликда экстрадиция қилинади.
Аввалроқ Латвияда ўзини элчихона ходими сифатида таништириб, одамларни чув тушириб юрган Ўзбекистон фуқаросини экстрадиция қилингани тўғрисида хабар берилганди. Шунингдек, март охирларида Интерполнинг Ўзбекистондаги Миллий марказий бюроси ходимлари томонидан халқаро қидирувда бўлган шахсни экстрадиция қилиш Швециядан биринчи марта амалга оширилди.
Изоҳ (0)