АҚШ Минск ва Москва ўртасида Россиянинг тактик ядро қуролларини Беларусга топшириш бўйича тузилган келишувни кескин қоралади. Давлат департаменти матбуот котиби Метю Миллер буни Россиянинг Украинага босқинидан кейин навбатдаги масъулиятсиз хатти-ҳаракат, деб атади.
Украинага қарши кимёвий, биологик ёки ядровий қуроллардан фойдаланиш “жиддий оқибатларга олиб келади”, деб огоҳлантирди Миллер. Шу билан бирга, Вашингтон ўз ядровий кучларининг тайёргарлигини қайта кўриб чиқиш учун ҳали сабаб кўрмаяпти ва Россиянинг ядровий қуролдан фойдаланиш ниятини тасдиқловчи белгини сезмаяпти.
“Биз ўз стратегик ядро салоҳиятимизни ўзгартириш учун ҳеч қандай сабаб кўрмаяпмиз”, — деди Miller.
25 май куни Беларусь раҳбари Александр Лукашенко Москвада Россиянинг тактик ядровий қуролларини мамлакат ҳудудига ўтказиш бошлангани ҳақида эълон қилди. “Уларни сақлайдиган омборларни тайёрлаш керак эди. Барчасини қилдик. Шунинг учун ядровий ўқ-дориларни кўчириш жараёни бошланди”, — деди у.
Лукашенко тактик ядро қуроллари Беларусь ҳудудига аллақачон киритилганини истисно қилмади ва республикага қайтгач бунга ойдинлик киритишини айтди.
Изоҳ (0)