Озарбайжон ва Арманистон бир-бирининг ҳудудий яхлитлигини тан олишга келишиб олди. Россия матбуоти хабарига кўра, тегишли баёнотлар 25 май куни Москвада бўлиб ўтган Олий Евросиё иқтисодий кенгаши йиғилишида Арманистон бош вазири Никол Пашинян ва Озарбайжон президенти Илҳом Алиев томонидан билдирилган.
“Шуни тасдиқламоқчиманки, Арманистон ва Озарбайжон бир-бирининг ҳудудий яхлитлигини ўзаро тан олиш тўғрисида келишиб олди ва шу асосда муносабатларимизни тартибга солиш йўлида анча яхши қадамлар ташлаяпмиз”, — дея Никол Пашинян сўзларидан иқтибос келтирган “ТАСС”.
22 май куни Пашинян Ереванда бўлиб ўтган матбуот анжуманида Тоғли Қорабоғни Озарбайжоннинг бир қисми сифатида тан олишини, лекин у ердаги арманлар хавфсизлиги таъминланиши шарт эканини айтганди.
Шундан келиб чиқиб, 25 май куни Илҳом Алиев Боку ва Ереванда тинчлик келишувига эришиш имконияти борлигини таъкидлади.
Алиев ва Пашинян ўртасидаги келишмовчиликлар
Шу билан бирга “РИА Новости” агентлигининг хабар беришича, Никол Пашинян Олий Евросиё иқтисодий кенгашининг кенгайтирилган йиғилишида Илҳом Алиевнинг “Зангезур йўлаги” иборасини қўллашидан норозилигини билдирган. Алиевнинг Озарбойжонни Нохичевон мухтор республикаси билан боғлайдиган Зангезур йўлагини тилга олиши, Арманистон бош вазирининг сўзларига кўра, Бокунинг Ереванга нисбатан ҳудудий даъволари билан боғлиқ. Пашинян таъкидлаганидек, Арманистон, Озарбайжон ва Россия раҳбарларининг уч томонлама баёнотида фақат Лочин йўлаги (Арманистонни Тоғли Қорабоғ билан боғлайди) ҳақида гап бор.
Бунга жавобан Алиев ўз сўзларида ҳудудий даъволар йўқлигини ва у ишлатган “йўлак” атамаси халқаро амалиётда қабул қилинганини таъкидлади.
Арманистон ва Озарбайжон раҳбарлари ўртасидаги келишмовчиликларга Лочин йўлагидаги вазиятга турлича баҳо берилиши ҳам сабаб бўлган: Пашинянга кўра, йўлак ҳозир блоклаб қўйилган, Алиев буни рад этмоқда.
Изоҳ (0)