AQSH Minsk va Moskva o‘rtasida Rossiyaning taktik yadro qurollarini Belarusga topshirish bo‘yicha tuzilgan kelishuvni keskin qoraladi. Davlat departamenti matbuot kotibi Metyu Miller buni Rossiyaning Ukrainaga bosqinidan keyin navbatdagi masʼuliyatsiz xatti-harakat, deb atadi.
Ukrainaga qarshi kimyoviy, biologik yoki yadroviy qurollardan foydalanish “jiddiy oqibatlarga olib keladi”, deb ogohlantirdi Miller. Shu bilan birga, Vashington o‘z yadroviy kuchlarining tayyorgarligini qayta ko‘rib chiqish uchun hali sabab ko‘rmayapti va Rossiyaning yadroviy quroldan foydalanish niyatini tasdiqlovchi belgini sezmayapti.
“Biz o‘z strategik yadro salohiyatimizni o‘zgartirish uchun hech qanday sabab ko‘rmayapmiz”, — dedi Miller.
25-may kuni Belarus rahbari Aleksandr Lukashenko Moskvada Rossiyaning taktik yadroviy qurollarini mamlakat hududiga o‘tkazish boshlangani haqida e’lon qildi. “Ularni saqlaydigan omborlarni tayyorlash kerak edi. Barchasini qildik. Shuning uchun yadroviy o‘q-dorilarni ko‘chirish jarayoni boshlandi”, — dedi u.
Lukashenko taktik yadro qurollari Belarus hududiga allaqachon kiritilganini istisno qilmadi va respublikaga qaytgach bunga oydinlik kiritishini aytdi.
Izoh (0)