Qashqadaryoda 28 yoshli ayolning jasadi hammomdan topilgani, uni sobiq eri o‘ldirib ketgani to‘g‘risida xabar berilgandi. “Markaziy studiya” informatsion dasturida ma’lum qilinishicha, qotil erkakka nisbatan sud hukmi o‘qilgan.
Qayd etilishicha, ayol Kasbi tumanining “Tinchlik” mahallasidan “Qamashi” mahallasiga turmushga chiqqan. Oilaviy kelishmovchiliklar sabab 3 nafar farzandi bilan o‘zining mahallasiga qaytib, ijarada yashab kelgan.
2022-yilning 7-dekabr kuni Jinoyat kodeksining 97-moddasi 1-qismi (qasddan odam o‘ldirish) bilan jinoyat ishi qo‘zg‘atilib, gumonlanuvchi protsessual tartibda ushlangan.
Olti oy davom etgan tergov jarayonlaridan keyin ish sudga oshirilgan. Sud jarayonida erkak o‘sha kuni mast bo‘lganini aytib, o‘zini oqlamoqchi bo‘lgan.
Sud hukmiga ko‘ra, ayolini o‘ldirgan sudlanuvchiga nisbatan 11 yil-u 6 oy muddatga ozodlikdan mahrum qilish jazosi tayinlangan.
Er-xotin o‘rtasidagi qotillik holatlari
Bir necha kun oldin Sirdaryo viloyati Shirin shahrida xotinini farzandi yonida pichoqlab o‘ldirgan erkakka sud hukmi o‘qilgandi. Undan oldin esa Sankt-Peterburgda o‘zbekistonlik erkak 19 yoshli xotinini bo‘g‘ib o‘ldirgani, Jizzaxda o‘g‘li va ayolini o‘ldirib, yoqib yuborgan 23 yoshli yigit umrbodga qamalgani, Jizzaxda janjal oqibatida xotinini vannada pichoqlab o‘ldirgan erkakka hukm o‘qilgani to‘g‘risida xabar berilgandi.
Izoh (0)