Бугун, 25 май куни Рақамли технологиялар вазири Шерзод Шерматов Тошкент шаҳридаги ўзи ўқиган 22-сонли мактабга бориб, “сўнги қўнғироқ” тадбирида иштирок этди. Тантанада вазир битирувчиларни байрам билан табриклаб, уларга оқ йўл тилади, келажакда яхши мутахассис бўлиш учун нималарга эътибор бериш кераклиги ҳақида зарур масалаҳатларини берди. Тадбир якунида “Дарё” мухбири вазирлик раҳбаридан интервью олди.
“Мактаб давримда комютер ва интернет бўлмаган”
Одам барибир ўзи ўқиган мактабини эслайди, у ердаги кечинмаларини хаёлига келтиради. Биз ўқиган пайтдаги мактаблар билан ҳозиргиларининг орасида жуда катта фарқлар бор. Масалан, ўқувчилик пайтимда мактабда тайинли компьютер бўлмасди. Ҳозир мана нечта компьютерлар бор. Интернет ҳам бўлмаган. Бугун нафақат мактабларда, балки ҳар бир ўқувчининг қўлида интернети бор.
Чет тили ва замонавий билимларни ўрганаман деса, ёшлар учун ҳозир ҳамма шароит мавжуд. Институтларнинг сони ҳам ошиб бормоқда. Бизнинг давримизда институтга кириш ҳам жуда қийин масала эди. Ҳозир истаган одам кириши мумкин. Чет элга кетиш имконияти ҳам кенгайган. Масалан, “Эл-юрт умиди” фонди томонидан минглаб болалар чет элга ўқишга юбориляпти. Гранд орқали ўзи кетаётганлар қанча.
Ҳозир яна бир ҳолат оддий бўлиб қолди. Бир бола ҳали мактабни битирмасдан туриб, имтиҳон топширгани ва 10 та институтга ўқишга кирганини айтиб турибди. Шундай имкониятлардан фойдаланиб, ният қилиб, олдинга ҳаракат қилиш керак.
“Ҳамма ҳам институтга кириши шарт эмас”
Ҳар қанақа одамнинг базаси мактабда бўлади. Мактаб болага билим олиш, ўз устида ишлаш ва инсонлар билан мулоқотда бўлишни ўргатади. Ҳам ҳаётга тайёргарлик, ҳам билим, ҳам тажриба мактабда бўлади. Шунинг учун менинг ҳам фаолиятимда мактабнинг ўрни катта. Одам ким бўлса-да унинг базасини мактаб тайёрлаб берган бўлади.
Бугун ёшларнинг олдида турли имкониятлар бор. Яъни хоҳласа, давлат ишида, илм-фан йўналишида ишлаши мумкин, ёки тадбиркорлик билан шуғулланиш йўли мавжуд. Йўналишлар кўп. Асосийси, ўзига мосини танлаш керак.
“Институтга кира олмадим, энди ҳаётим синди”, деб ўйлаш нотўғри. Ҳамма ҳам институтга кириши шарт эмас. Айниқса, IT соҳасида институтга кирмасдан ҳам яхши дастурчи бўлиш мумкин. Келажакда яхши инсон бўлиш, оила қуриб, шу жамиятда оиласига, ўзига фойдали иш қилиш муҳим.
“Авваллари хусусий мактабларга душмандек қаралган”
Бугун мактабда соҳага қизиқадиган ёшларга IT’ни ўқитиш бўйича текин ваучерлар совға қилдик. Мактаб раҳбари билан дарсларга қўшимча равишда IT курсларини ҳам ташкил қилишга келишиб олдик. Қанча кўп ёш айтишниклар етишиб чиқса, экспортимиз ҳажми шунча ошади. Масалан, IT хизматлари ҳажми жорий йилнинг биринчи чорагида ўтган йилга нисбатан уч бараварга ошди. Январь март ойларининг ўзида 2021 йилдагидан кўпроқ экспорт қилдик. Бу имконият кўп дегани. Инглиз тили ва IT ўқиш керак. Шунда бемалол бизнинг соҳада ишлаш мумкин. Яъни ёшлар ўз юртида оиласи билан яшаб, чет элга хизмат кўрсатиб, юқори даромад олиш имкониятига эга. Биз соҳага масъул давлат идораси сифатида мазкур имкониятни кўпайтириш устида ишлаймиз. Ўзбекистонга кўпроқ буюртма олиб келишга ҳаракат қиляпмиз.
Олдин хусусий мактаб, олий таълим ва бошқа ўқув муассасаларига душмандек қараларди. Мана ҳозир уларнинг сони кўп. Бу рақобат деган. Рақобат бўлгани фақат фойда келтиради. Ҳозир IT парк резидентлари сони 250 тага етди. Биз уларнинг сонини янада кўпайтириш тарафдоримиз. Бу ҳам давлат муассасаларини ўзининг устида ишлашга ундайдиган йўналишдир. Бугунги кунда ёшларда олдингидек диплом олсам бўлди, деган қараш йўқолиб, ўқишим, билим олишим керак, деган фикр шаклланяпти. Мана шунинг ўзи жуда катта ютуқ.
Исломбек Умаралиев суҳбатлашди
Изоҳ (0)