Bugun, 25-may kuni Raqamli texnologiyalar vaziri Sherzod Shermatov Toshkent shahridagi o‘zi o‘qigan 22-sonli maktabga borib, “so‘ngi qo‘ng‘iroq” tadbirida ishtirok etdi. Tantanada vazir bitiruvchilarni bayram bilan tabriklab, ularga oq yo‘l tiladi, kelajakda yaxshi mutaxassis bo‘lish uchun nimalarga e’tibor berish kerakligi haqida zarur masalahatlarini berdi. Tadbir yakunida “Daryo” muxbiri vazirlik rahbaridan intervyu oldi.
“Maktab davrimda komyuter va internet bo‘lmagan”
Odam baribir o‘zi o‘qigan maktabini eslaydi, u yerdagi kechinmalarini xayoliga keltiradi. Biz o‘qigan paytdagi maktablar bilan hozirgilarining orasida juda katta farqlar bor. Masalan, o‘quvchilik paytimda maktabda tayinli kompyuter bo‘lmasdi. Hozir mana nechta kompyuterlar bor. Internet ham bo‘lmagan. Bugun nafaqat maktablarda, balki har bir o‘quvchining qo‘lida interneti bor.
Chet tili va zamonaviy bilimlarni o‘rganaman desa, yoshlar uchun hozir hamma sharoit mavjud. Institutlarning soni ham oshib bormoqda. Bizning davrimizda institutga kirish ham juda qiyin masala edi. Hozir istagan odam kirishi mumkin. Chet elga ketish imkoniyati ham kengaygan. Masalan, “El-yurt umidi” fondi tomonidan minglab bolalar chet elga o‘qishga yuborilyapti. Grand orqali o‘zi ketayotganlar qancha.
Hozir yana bir holat oddiy bo‘lib qoldi. Bir bola hali maktabni bitirmasdan turib, imtihon topshirgani va 10 ta institutga o‘qishga kirganini aytib turibdi. Shunday imkoniyatlardan foydalanib, niyat qilib, oldinga harakat qilish kerak.
“Hamma ham institutga kirishi shart emas”
Har qanaqa odamning bazasi maktabda bo‘ladi. Maktab bolaga bilim olish, o‘z ustida ishlash va insonlar bilan muloqotda bo‘lishni o‘rgatadi. Ham hayotga tayyorgarlik, ham bilim, ham tajriba maktabda bo‘ladi. Shuning uchun mening ham faoliyatimda maktabning o‘rni katta. Odam kim bo‘lsa-da uning bazasini maktab tayyorlab bergan bo‘ladi.
Bugun yoshlarning oldida turli imkoniyatlar bor. Yaʼni xohlasa, davlat ishida, ilm-fan yo‘nalishida ishlashi mumkin, yoki tadbirkorlik bilan shug‘ullanish yo‘li mavjud. Yo‘nalishlar ko‘p. Asosiysi, o‘ziga mosini tanlash kerak.
“Institutga kira olmadim, endi hayotim sindi”, deb o‘ylash noto‘g‘ri. Hamma ham institutga kirishi shart emas. Ayniqsa, IT sohasida institutga kirmasdan ham yaxshi dasturchi bo‘lish mumkin. Kelajakda yaxshi inson bo‘lish, oila qurib, shu jamiyatda oilasiga, o‘ziga foydali ish qilish muhim.
“Avvallari xususiy maktablarga dushmandek qaralgan”
Bugun maktabda sohaga qiziqadigan yoshlarga IT’ni o‘qitish bo‘yicha tekin vaucherlar sovg‘a qildik. Maktab rahbari bilan darslarga qo‘shimcha ravishda IT kurslarini ham tashkil qilishga kelishib oldik. Qancha ko‘p yosh aytishniklar yetishib chiqsa, eksportimiz hajmi shuncha oshadi. Masalan, IT xizmatlari hajmi joriy yilning birinchi choragida o‘tgan yilga nisbatan uch baravarga oshdi. Yanvar-mart oylarining o‘zida 2021-yildagidan ko‘proq eksport qildik. Bu imkoniyat ko‘p degani. Ingliz tili va IT o‘qish kerak. Shunda bemalol bizning sohada ishlash mumkin. Yaʼni yoshlar o‘z yurtida oilasi bilan yashab, chet elga xizmat ko‘rsatib, yuqori daromad olish imkoniyatiga ega. Biz sohaga masʼul davlat idorasi sifatida mazkur imkoniyatni ko‘paytirish ustida ishlaymiz. O‘zbekistonga ko‘proq buyurtma olib kelishga harakat qilyapmiz.
Oldin xususiy maktab, oliy taʼlim va boshqa o‘quv muassasalariga dushmandek qaralardi. Mana hozir ularning soni ko‘p. Bu raqobat degan. Raqobat bo‘lgani faqat foyda keltiradi. Hozir IT park rezidentlari soni 250 taga yetdi. Biz ularning sonini yanada ko‘paytirish tarafdorimiz. Bu ham davlat muassasalarini o‘zining ustida ishlashga undaydigan yo‘nalishdir. Bugungi kunda yoshlarda oldingidek diplom olsam bo‘ldi, degan qarash yo‘qolib, o‘qishim, bilim olishim kerak, degan fikr shakllanyapti. Mana shuning o‘zi juda katta yutuq.
Islombek Umaraliyev suhbatlashdi
Izoh (0)