Ўзбекистонда 2023/2024-ўқув йилидан бошлаб ўқувчиларнинг қизиқиш ва қобилиятига мос бўлган дастурлар жорий этилади. Бу ҳақда Мактабгача ва мактаб таълими вазирлиги ахборот хизмати хабар берди.
Унга кўра, 2023/2024-ўқув йилидан бошлаб босқичма-босқич умумий ўрта таълим муассасаларининг 1–4-синфларида ўқувчиларга бошланғич, 5–9-синфларда таянч ҳамда 10–11-синф ўқувчиларининг қизиқиш ва қобилиятига мос бўлган ихтисослашган билимларни беришга йўналтирилган дастур ва ўқув-методик мажмуалар жорий этилади.
Ўқувчилар билимини баҳолашнинг янги тартиби жорий этилади ва унинг доирасида ўқитувчи томонидан ўқувчиларнинг ўтилган мавзуни амалиётда қўллай билиш, танқидий фикрлаш ва берилган материални таҳлил қила олиш каби кўникмалари баҳоланади.
Шунингдек, умумий ўрта таълим муассасалари ўқувчиларига 1-синфдан бошлаб компьютер саводхонлиги ўргатилади, юқори синфларда эса уларнинг молиявий саводхонлигини оширишга қаратилган дарслар жорий этилади. Барча фанлар бўйича амалий машғулотлар улуши 60 фоизга етказилади. Бунда дарслардаги мавзулар аниқ муаммони ҳал қилиш орқали ўргатилади, амалиёт дарслари эса лойиҳани бажариш шаклида ўтказилади.
Изоҳ (0)