Surxondaryo viloyati hokimi Ulug‘bek Qosimov va “O‘zbekgidroenergo” aksiyadorlik jamiyati raisi, senator Abdug‘ani Sanginov “To‘palang” GESda yakunlangan modernizatsiya ishlari bilan tanishdi, deb xabar beradi O‘zA.
Qayd etilishicha, elektr energiyasi ishlab chiqarish barqarorligini taʼminlash uchun Sariosiyo tumanidagi “To‘palang” GES 75,4 million yevro mablag‘ evaziga modernizatsiya qilinib, zamonaviy texnologiyalar bilan jihozlangan. So‘nggi sinov ishlari olib borilayotgan shu kunlarda gidroelektr stansiyasi 64 megavatt elektr energiyasi ishlab chiqarib, tarmoqqa uzatmoqda. Bu energiya vohadagi 36 mingdan ortiq xonadonni ekologik toza elektr energiyasi bilan ta’minlayapti.
Sinov ishlari to‘liq yakunlangach, gidroelektr stansiya to‘la quvvat bilan ishga tushirilib, 175 megavatt elektr energiyasi ishlab chiqara boshlaydi. Isteʼmolchilarga yiliga 467 million kVt/soat elektr energiyasi uzatib, 126,2 million kub/metr tabiiy gazni tejaydi.
Ulug‘bek Qosimov yangi o‘rnatilgan texnologiyalarning ish jarayonlarini kuzatgan. Ulardan samarali foydalanish bo‘yicha taklif va tavsiyalar bildirilgan.
2022-yil iyunda “To‘palang” GESdan yuqori bosim bilan suv chiqishi aks etgan video tarqalgandi. Favqulodda vaziyatlar vazirligi suv omborining mustahkamligiga ziyon yetmagani, ayni vaqtda chiqarilayotgan suv hajmini kamaytirish ishlari olib borilayotganini ma’lum qilgan edi. “O‘zbekgidroenergo” modernizatsiya loyihasi doirasida sinov ishlari olib borilayotgan bosimli suv quvuri to‘sini shikastlanib, qo‘shimcha 40 metr kub/soniya atrofida suv miqdori GES binosi orqali chiqqanini bildirgan. Ko‘p o‘tmay Surxondaryoning o‘sha vaqtdagi hokimi To‘ra Bobolov “To‘palang” suv omboridan turib aholiga videomurojaat bilan chiqqandi.
Ma’lumot uchun, To‘palang suv ombori 1982-yilda qurila boshlangan bo‘lib, loyiha quvvati 500 million kub metr. Suv ombori to‘g‘onining balandligi 165 metr, yana 22 metr yer ostiga poydevor qilingan, umumiy 187 metrni tashkil qiladi.
Izoh (0)