Украина президенти Владимир Зеленский Киев ва Москва ўртасидаги зиддият бўйича ўз нуқтаи назарини билдириши учун Араб давлатлари лигаси (АДЛ) саммитига таклиф олган. Бу ҳақда Саудия Арабистони ташқи ишлар вазири Файсал бин Фархон Ол Сауд Аl Arabiya ва Al-Jazeera телеканалларига маълум қилди.
Вазирнинг қайд этишича, саммит иштирокчилари урушнинг ҳар икки томони позициясини эшитиш имкониятини олқишлайди. ТИВ раҳбари низони мулоқотдан бошқа йўл билан ҳал қилиш имконсизлигини таъкидлади. Унинг сўзларига кўра, араб давлатларининг инқирозга муносабати “ижобий нейтрал” бўлиб қолмоқда.
Вазир, шунингдек, Россия президенти Владимир Путиннинг саммит иштирокчиларига мактубини олқишлади. Матн Кремль сайтида эълон қилинган бўлиб, унда араб давлатлари билан ҳамкорликни кенгайтириш, минтақадаги можароларни ҳал қилишга ёрдам бериш ҳақида гап боради. Украина ҳақида сўз юритилмаган.
Зеленский Саудия Арабистонига ташриф буюрганидан сўнг (бу унинг мамлакатга биринчи ташрифи эди) Twitterъда Украинанинг ҳудудий яхлитлиги ва суверенитетини қўллаб-қувватлаган бош вазир ва Қироллик валиаҳди Муҳаммад бин Салмон Ол Саудга миннатдорлик билдирди. Шунингдек, у Кувайт, Бирлашган Араб Амирликлари, Уммон ва Ироқ вакиллари билан икки томонлама учрашувлар ўтказганини қўшимча қилди.
Араб давлатлари лигаси 1945 йил 22 мартда Қоҳирада ташкил этилган. АДЛ асосчилари — Миср, Ироқ, Ливан, Саудия Арабистони, Сурия, Иордания ва Ямандир.
Энди Украина раҳбари 19—21 май кунлари G7 мамлакатлари (гуруҳга АҚШ, Буюк Британия, Германия, Франция, Италия, Канада ва Япония киради) саммити бўлиб ўтаётган Японияга боради. Зеленский офиси раҳбари Андрей Ермак Украина президентининг тадбирда шахсан иштирок этишини, шунингдек, америкалик ҳамкасби Жо Байден билан учрашув ўтказишини ва у билан долзарб масалаларни муҳокама қилишини тасдиқлади.
Изоҳ (0)