Украина президенти Владимир Зеленский G7 саммити бўлиб ўтадиган Хиросимага шахсан ташриф буюради, деб хабар бермоқда Kyodo Япония ва АҚШ делегацияларидаги манбаларга таяниб. Худди шу маълумотни Ғарб оммавий ахборот воситалари, хусусан, The New York Times, CNN ва Bloomberg ҳам тасдиқлади.
Аввалроқ Япония расмийлари Зеленский видеоалоқа орқали саммит муҳокамаларидан бирида иштирок этишини маълум қилганди. Зеленскийнинг ташрифи ҳақида ҳали бирорта жамоатчилик эълон қилмаган. Украина президентининг саммитга келиш куни хавфсизлик нуқтаи назаридан ошкор қилинмаяпти.
Хиросимага сафар Украина президентининг Россия босқини бошланганидан бери Осиёга биринчи ташрифи бўлади. Bloomberg хабарига кўра, у Саудия Арабистонида Араб давлатлари лигаси саммитига ташриф буюрганидан сўнг АҚШ ҳарбий-ҳаво кучларининг ҳарбий самолётида Японияга учади. Яқинда Украина раҳбари Италия, Германия, Франция ва Буюк Британияга сафар қилиб, у ерда Киевга янги қурол партияларини етказиб бериш бўйича келишиб олганди.
19 май куни Хиросимада G7 саммити очилди, у уч кун давом этади. Тадбир иштирокчилари Россиянинг Украинага қарши ҳарбий тажовузига жавобан янги санкцияларни муҳокама қилиш ниятида.
Аввал хабар қилинганидек, бошқа масалалар қаторида Қўшма Штатлар Россияга дори-дармон ва озиқ-овқат маҳсулотларидан ташқари деярли барча товарлар экспортига эмбарго қўйиш таклифини муҳокамага қўймоқчи. Бу таклиф Япония ва Европа Иттифоқи томонидан қўллаб-қувватланмаган.
Изоҳ (0)