Шимолий Атлантика альянси вакили адмирал Роб Бауэр Россия билан исталган вақтда можаро келиб чиқиши мумкин, деб ҳисоблайди. Вилнюсдаги саммитда НАТО аъзолари минглаб саҳифадан иборат махфий ҳарбий режани тасдиқламоқчи.
Совуқ урушдан бери биринчи марта НАТО Россиядан эҳтимолий ҳужумларни қайтариш режасини тайёрламоқда. 18 май куни Reuters агентлигининг хабар беришича, июль ойида Вилнюсда бўлиб ўтадиган саммитда НАТОга аъзо давлатлар Россия билан юзага келиши мумкин бўлган қарама-қаршилик бўйича минглаб саҳифали махфий режаларни қабул қилади.
Сўнгги ўн йиллар ичида биринчи марта бу режалар Россия билан эҳтимолий ҳарбий қарама-қаршиликни батафсил баён қилади. Агентлик тушунтирганидек, бунинг сабаби — Россиянинг Украинага қарши уруши бошланганидан сўнг НАТО анчадан бери альянс учун “экзистенсиал таҳдид” ҳисобланмаган Россия Федерациясига нисбатан сиёсатини қайта кўриб чиқди.
“Уруш исталган вақтда бошланиши мумкин”
“Биз (Россия билан) исталган вақтда можаро келиб чиқишига тайёр бўлишимиз керак”, — дея НАТОнинг олий ҳарбий амалдорларидан бири, адмирал Роб Бауэрнинг сўзларидан иқтибос келтиради Reuters агентлиги. Унинг сўзларига кўра, Вилнюсдаги саммитда НАТО аъзо давлатларга ўз Қуролли кучлари ва логистикасини қандай модернизация қилиш кераклиги ҳақида ҳам тавсиялар беради.
НАТО бош котиби Йенс Столтенберг ўз навбатида “Иттифоқчилар қандай кучлар ва воситалар кераклигини, жумладан, қаерда, нимани ва қандай жойлаштириш кераклигини аниқ билиб олади”, деди. Альянс вакилларининг сўзларига кўра, барча режаларни амалга ошириш учун бир неча йил керак бўлади, бироқ НАТО, керак бўлса, дарҳол жангга киришга тайёрланади.
АҚШ Мудофаа вазири Ллойд Остиннинг таъкидлашича, НАТО Россия билан қарама-қаршиликка интилмаяпти, балки “НАТОнинг бир иттифоқчисига ҳужум барчага ҳужум демакдир” тамойилига амал қилмоқда.
Изоҳ (0)