Қиролича Елизавета II нинг дафн маросими ва бир неча кун давом этган мотам тадбирлари Буюк Британия бюджетга тахминан 162 миллион фунт стерлинг ёки 201 миллион долларга тушди, деди мамлакат молия вазирининг иқтисодий масалалар бўйича ўринбосари Жон Глен.
Елизавета II 2022 йил 8 сентябрда 96 ёшида вафот этганди, дафн маросими 19 сентябрда бўлиб ўтди. Миллий мотам ўн кун давом этди, бу вақт ичида қироличанинг тобути қўйилган Вестминстер саройига юз минглаб одамлар ташриф буюрди.
“Қирол ҳазратлари ва қироллик оиласининг бошқа аъзоларини қўллаб-қувватлаш учун жуда кўп одамлар келди. Ҳукуматнинг устувор вазифалари ушбу тадбирларнинг муаммосиз ва муносиб даражада ўтишини таъминлаш эди”, — деди Глен ва фуқаролар хавфсизлигини кафолатлаш зарур бўлганини ҳам таъкидлади.
Британия Ички ишлар вазирлиги (74 миллион фунт стерлинг) ҳамда Рақамли, маданият, медиа ва спорт вазирлиги (57 миллион фунт) энг кўп маблағ сарфлаган. Молия вазирлиги маълум қилишича, Шотландия ҳукумати (18,8 миллион фунт), Уэлс ва Шимолий Ирландия (ҳар бири 2 миллион фунт) харажатлари марказий бюджетдан қопланган.
Елизавета II вафотидан сўнг унинг ўғли Чарльз III Буюк Британия қироли бўлди, 6 май куни Вестминстер аббатлигида унинг тож кийиш маросими бўлиб ўтди. Тадбирга 3 мингга яқин меҳмон таклиф қилинди. Маросимнинг нархи расман ошкор этилмаган, бироқ Euronews интервью берган экспертларга кўра, у 57 миллиондан 113 миллион еврогача тушган бўлиши мумкин.
Изоҳ (0)