Украина мудофаа вазири ўринбосари Анна Маляр Украина Қуролли кучлари Бахмут учун жангларда маълум ҳудудларда илгарилагани ҳақида маълум қилди. Хусусан, унинг сўзларига кўра, Бахмут шимолида, 18 май куни бўлиб ўтган жангларда Украина кучлари айрим ҳудудларда ярим километр олдинга силжишга муваффақ бўлган.
Бахмутнинг жанубий чеккасида, Малярнинг таъкидлашича, рус қўшинлари ҳужумга ўтишга ва илгари йўқотилган позицияларни қайтаришга уринган, бироқ йўқотишларга учраган, Украина Қуролли кучлари бўлинмалари эса у ердаги ҳудудларда бир километр илгарилашга муваффақ бўлган.
Мудофаа вазири ўринбосари Украина ҳарбийлари Бахмутнинг жануби-ғарбий қисмини назорат қилишда давом этаётганини айтди, аммо Россия қўмондонлиги “захирадаги кучларининг катта қисмини шаҳарга тортиб келгани ва бўлинмаларни сезиларли даражада кучайтиргани”ни даъво қилганди.
BBC рус хизмати таъкидлаганидек, Малярнинг баёноти Бахмутда содир бўлаётган воқеаларнинг умумий манзарасини тасдиқлайди, бу ҳақда сўнгги бир неча кун ичида турли манбалар ёзмоқда: “Вагнер” гуруҳи ёлланма аскарлари Бахмут шаҳри чегараларида силжишга ҳаракат қилмоқда, Украина қўшинлари эса аҳоли пунктини ўраб турган қанотларда олдинга бормоқда.
“Вагнер” асосчиси Евгений Пригожин, ўз навбатида, Бахмутда ёлланма аскарлар баъзи жойларда “400 метр” олдинга юргани, Украина ҳарбийлари эса шаҳарнинг атиги “бир квадрат километрини” ушлаб турганини даъво қилмоқда.
Изоҳ (0)