Ukraina prezidenti Vladimir Zelenskiy G7 sammiti bo‘lib o‘tadigan Xirosimaga shaxsan tashrif buyuradi, deb xabar bermoqda Kyodo Yaponiya va AQSH delegatsiyalaridagi manbalarga tayanib. Xuddi shu ma’lumotni G‘arb ommaviy axborot vositalari, xususan, The New York Times, CNN va Bloomberg ham tasdiqladi.
Avvalroq Yaponiya rasmiylari Zelenskiy videoaloqa orqali sammit muhokamalaridan birida ishtirok etishini ma’lum qilgandi. Zelenskiyning tashrifi haqida hali birorta jamoatchilik e’lon qilmagan. Ukraina prezidentining sammitga kelish kuni xavfsizlik nuqtayi nazaridan oshkor qilinmayapti.
Xirosimaga safar Ukraina prezidentining Rossiya bosqini boshlanganidan beri Osiyoga birinchi tashrifi bo‘ladi. Bloomberg xabariga ko‘ra, u Saudiya Arabistonida Arab davlatlari ligasi sammitiga tashrif buyurganidan so‘ng AQSH harbiy-havo kuchlarining harbiy samolyotida Yaponiyaga uchadi. Yaqinda Ukraina rahbari Italiya, Germaniya, Fransiya va Buyuk Britaniyaga safar qilib, u yerda Kiyevga yangi qurol partiyalarini yetkazib berish bo‘yicha kelishib olgandi.
19-may kuni Xirosimada G7 sammiti ochildi, u uch kun davom etadi. Tadbir ishtirokchilari Rossiyaning Ukrainaga qarshi harbiy tajovuziga javoban yangi sanksiyalarni muhokama qilish niyatida.
Avval xabar qilinganidek, boshqa masalalar qatorida Qo‘shma Shtatlar Rossiyaga dori-darmon va oziq-ovqat mahsulotlaridan tashqari deyarli barcha tovarlar eksportiga embargo qo‘yish taklifini muhokamaga qo‘ymoqchi. Bu taklif Yaponiya va Yevropa Ittifoqi tomonidan qo‘llab-quvvatlanmagan.
Izoh (0)