Наманганда 62-халқаро гуллар фестивалига астойдил тайёргарлик кўрилмоқда. Бу ҳақда “Дарё” мухбири Азизбек Абдувалиев хабар бермоқда.
Бу галги фестивалнинг олдинги йиллардагидан фарқли жиҳатлари кўп.
Биринчидан, фестиваль 5-10 ёки 15 кун эмас, нақ бир ой давом этади.
Иккинчидан, байрам тадбирлари аввалгидек фақат Бобур номли боғни эмас, “Афсоналар водийси” паркини ҳам қамраб олади.
Учинчидан, халқаро мақомни олган фестивалга кўплаб дунё эстрадаси юлдузларининг ташрифи кутилмоқда. Жумладан, туркиялик хонанда Рафет эл Роман, озарбайжонлик Толиб Тале ва Зайнаб Ҳасаний концерт дастурлари билан иштирок этишларини тасдиқлади.
Бир ой давом этадиган фестивалнинг ҳар бир куни мароқли ўтишини таъминлаш мақсадида кенг кўламдаги маданий-кўнгилочар дастурлар тузилган.
Жумладан, байрам давомида ҳунармандлар, этноспорт ва дунё таомлари фестиваллари, ўзбек палови чемпионати, лазер ва дрон-шоу, қўл жанги бўйича халқаро турнир, “Талант-шоу” ва “Иллюзия-шоу”, Фарғона водийси мода ҳафталиги ва жаҳон киноси ҳафталиги, Ўзбекистон Миллий симфоник оркестрининг очиқ осмон остидаги концерти, Ўзбекистон давлат драма театри спекталлари ва Ўзбек давлат цирки томошалари бўлиб ўтади.
Энг асосийси, Наманган меҳмонларни боғлар, кўча ва хиёбонларга экилган 50 дан ортиқ турдаги 30 миллиондан зиёд гуллар билан қарши олади.
Фестиваль давомида гуллардан нафақат баҳра олиш, балки хўжалик ёки хонадон учун харид қилиш имконияти ҳам яратилади. Бунинг учун Бобур боғи атрофида савдо расталари тайёрланмоқда.
Изоҳ (0)