Футбол бўйича У-21 чемпионати 10-тур доирасидаги “Нефтчи” ва “Бунёдкор” учрашуви ўтказилмайдиган бўлди. Бу ҳақида ПФЛ расмий сайти маълум қилди.
ПФЛ қуйидагича баёнот берди:
Суперлига ва Про Лига регламенти 4.1-бандига кўра, мусобақа доирасидаги учрашувлар “Лицензиялаш регламенти” асосида ишлаб чиқиладиган “Стадионлар тўғрисидаги низом”га мувофиқ Лига томонидан рухсат этилган стадионларда ўтказилади.
4.3-бандга асосан форс-мажор ҳолатида учрашувни ўтказиш учун стадионни ўзгартиришга тўғри келса, мезбон футбол клубига Лига билан уч томонлама келишувга эришган бошқа стадионлардан биридагина расмий учрашувни ўтказиш учун рухсат берилади. Аммо Қиргулидаги “Нефтчи” спорт мажмуаси ҳамон Лиганинг минимал талабларига тўла тайёр бўлгани йўқ. Лига мутахассисининг мавжуд камчиликларни бартараф этиш борасида берган кўрсатмалари ҳозирга қадар бажарилмади. Шунингдек, мазкур учрашувни кўчириш учун талаб даражасидаги бошқа бўш стадион тақдим этилмади.
Шуни инобатга олиб, У-21 чемпионати 10-тур учрашувлари доирасидаги “Нефтчи” — “Бунёдкор” учрашуви ўтказилмайдиган бўлди. Регламентга мувофиқ мезбон клубга 0:3 ҳисобидаги техник мағлубият, рақиб жамоага эса 3:0 ҳисобидаги техник ғалаба ёзилди.
Изоҳ (0)