Сирдарё вилоятида 500 долларга ҳайдовчилик гувоҳномаси олиб беришни ваъда қилган шахс қўлга олинди, деб хабар беради Бош прокуратура ҳузуридаги департамент.
Қайд этилишича, департаментнинг Сайхунобод туман бўлими томонидан тезкор тадбир ўтказилган. Тадбирда Д.А. исмли шахс фуқаро Ж.Т.га танишлари ёрдамида 500 долларга ҳайдовчилик гувоҳномасини олиб беришни ваъда қилиб, шундан 200 долларини олиб, қолган 300 долларни олган вақтида ашёвий далиллар билан ушланган.
Шу каби, Департаментнинг Қўқон шаҳар бўлими томонидан ўтказилган терговга қадар текширувда, “Б.А.” МЧЖ шаклидаги автомактаб раҳбари Б.Р. фуқаро Г.К.ни ҳайдовчилик гувоҳномаси олиш учун бўладиган назарий ва амалий имтиҳонлардан ўтказиб қўйишга ёрдам бериши эвазига 200 долларни фирибгарлик йўли билан қўлга киритгани аниқланган. Б.Р.нинг ушбу пулларни қайтаргани процессуал тартибда расмийлаштирилган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Апрель охирларида Тошкент вилоятида сохта сертификат эвазига ҳайдовчилик гувоҳномаси олган фуқарога суд ҳукми ўқилганди. Унга Жиноят кодексининг 59-моддасига асосан тайинланган жазоларни қисман қўшиш йўли билан узил-кесил ўташ учун иш ҳақининг 20 фоизини давлат даромади ҳисобига ушлаб қолган ҳолда 2,5 йил муддатга ахлоқ тузатиш ишлари жазоси тайинланган.
Изоҳ (0)