Покистон собиқ бош вазири Имрон Хон 9 май куни Исломободда мамлакат ҳарбийлаштирилган кучлари томонидан коррупцияда айбланиб ҳибсга олинди.
Хоннинг ҳибсга олиниши бутун мамлакат бўйлаб норозилик ва намойишларга сабаб бўлди, ҳукумат эса катта шаҳарларда интернетни узиб қўйди. Вазият сиёсий тартибсизликларни янада кучайтирди ва бутун мамлакат бўйлаб шиддатли намойишларга сабаб бўлди, жануби-ғарбий Кветта шаҳрида камида бир киши ҳалок бўлди. Хавфсизлик кучлари билан тўқнашувларда яна ўнлаб Имрон Хон тарафдорлари яраланди.
Имрон Хон бошчилигидаги “Теҳрик-э-Инсаф” мухолифат партияси етакчилари ҳам ҳибсга олинмоқда. 10 май куни партия бош котиби Асад Умар, кейинроқ партия раҳбари ўринбосари, Покистон собиқ ташқи ишлар вазири Шоҳ Маҳмуд Қурейши ҳибсга олинган.
Покистонда юз бераётган мазкур вазият дунё давлатлари ва халқаро ташкилотларнинг вазминлик ва хотиржамликка чақиришига олиб келди.
АҚШ
Қўшма Штатлар Покистонда демократик тамойиллар ва қонун устуворлигини ҳурмат қилишга чақирди.
“Биз Покистоннинг собиқ бош вазири Имрон Хоннинг ҳибсга олинганидан хабардормиз. Аввал айтиб ўтганимиздек, Қўшма Штатлар бир сиёсий номзод ёки партияга нисбатан позициясига эга эмас. Биз бутун дунёда демократик тамойиллар ва қонун устуворлигини ҳурмат қилишга чақирамиз”, — деди Оқ уй матбуот котиби Карин Жан-Пьер.
АҚШ давлат котиби Энтони Блинкен Жанубий Осиё давлатида қонун устуворлигига амал қилинишини исташини айтди.
“Покистонда содир бўлаётган ҳамма нарса конституция билан қонун устуворлигига мос келишига ишонч ҳосил қилишни хоҳлаймиз”, — деди у.
Буюк Британия
Британия ташқи ишлар вазири Жеймс Клеверли Покистондаги воқеалар ҳақида ҳали батафсил маълумот олиш имконига эга эмаслигини, бироқ Покистонда “тинч демократия”ни кўришни исташини айтди.
“Буюк Британия Покистон билан узоқ йиллик ва яқин муносабатларга эга. Биз бу мамлакатда тинч демократияни кўрмоқчимиз, қонун устуворлигига риоя этилишини истаймиз”, — деди Клеверли.
Айни пайтда Британия парламентининг таниқли депутати ва Лейбористлар партиясининг собиқ раҳбари Жереми Корбин Twitter’да Хоннинг ҳибсга олинишини қоралади.
“Покистоннинг собиқ бош вазири Имрон Хоннинг ҳибсга олиниши демократия учун қора кун”, — деди у.
Бирлашган Миллатлар Ташкилоти
БМТнинг юқори лавозимли расмийси Покистондаги барча сиёсий арбобларга адолатли муносабатда бўлишни ва тегишли жараёнга риоя қилишни таъминлаш зарурлигини таъкидлади. Расмийнинг баёноти Хон ҳибсга олинганидан бир неча соат ўтиб эълон қилинди.
Европа Иттифоқи
Европа Иттифоқи ўз баёнотида Покистондаги бундай “қийин ва кескин вақтларда” “ўзини тутиш ва совуққонлик зарурлигини” таъкидлади.
“Покистон муаммоларини фақат покистонликларнинг ўзлари, самимий мулоқот ва қонун устуворлиги асосида ҳал қилишлари мумкин”, — дейилади баёнотда.
Amnesty International
Amnesty International ташкилоти “тўқнашувлар авж олгани”дан хавотирда эканини айтди ва Покистон ҳукуматини “ўзини дадил тутишга” чақирди.
“Собиқ бош вазир ҳибсга олинганидан кейин Имрон Хоннинг тарафдорлари ва хавфсизликни таъминловчилар ўртасида юзага келган тўқнашувлар бир қанча инсон ҳуқуқлари бузилиши хавфини туғдиради”, — дейилади муносабатда.
Инсон ҳуқуқлари бўйича нотижорат ташкилоти Покистонда интернет хизматининг тўхтатилиши ва ижтимоий тармоқ иловалари блокланишидан хавотир билдирди. Бу “одамларнинг ахборотга киришини ва сўз эркинлигини чеклаши” қайд этилди.
Декабрь ойида Покистонда Имрон Хонни партия раҳбари лавозимидан четлаштириш жараёни бошланган. Бунга Имрон Хоннинг ҳукумат омборидан чет эллик мансабдор шахслар томонидан берилган совғаларни сотиб олгани ва Покистон Сайлов комиссиясига тақдим этилган декларацияларда уларни очиқламагани ҳақидаги даъволар сабаб бўлган.
Хонга қарши ҳаракат Европа Комиссияси томонидан октябрь ойида уни “коррупция ҳаракатларида” айбдор деб топгани, сиёсатчини 2018 йилда қўлга киритган депутатлик ҳуқуқидан маҳрум қилганидан кейин бошланган.
Изоҳ (0)