Тошкентда саёҳат учун БААга юборишни ваъда қилиб, фуқарони чув туширган сохта туристик агентлиги фаолиятига чек қўйилди. Бу ҳақда ИИВ Киберхавфсизлик маркази хабар берди.
Қайд этилишича, Юнусобод туманида яшовчи 26 ёшли М.Т. ариза билан мурожаат қилиб, Telegram мессенжерида номаълум шахс билан танишиб, БААга саёҳат учун тур-пакет сотиб олиш мақсадида унинг пластик картасига жами 20 миллион 950 минг сўм пулни ўтказиб бергандан сўнг, ушбу шахс ваъдасини бажармаганини маълум қилган.
Олиб борилган тезкор-қидирув тадбирлари натижасида, ушбу фирибгарлик жиноятини Тошкент вилояти Олмалиқ шаҳрида яшовчи 27 ёшли М.М. содир этгани аниқланган.
Маълумотларга кўра, М.М. Telegram мессенжерида “Жаҳонгир” номли аккаунт очиб, World-Travel номли гуруҳ яратиб, унда дунёнинг турли мамлакатларига саёҳат сафарларини ташкил қилиб бериш хизматларини таклиф қилган ҳолда алдовларига ишонган фуқароларнинг пулларини ўзлаштириб келгани маълум бўлган.
Жиноят содир этган М.М. Жиноят кодексининг 168-моддаси (фирибгарлик) 3-қисми “г” банди билан жиноий жавобгарликка тортилган. Қонунга мувофиқ, А.Ж. томонидан содир этилган жиноий ҳаракатлар учун 5 йилдан 8 йилгача озодликдан маҳрум қилиш жазоси назарда тутилган.
Изоҳ (0)