Тошкент вилояти Олмалиқ шаҳар 6-сонли имконияти чекланган болалар учун ихтисослаштирилган махус ёрдамчи мактаби 4—11 май кунлари бошланғич қиймати 69 миллион 103 минг сўмлик тендер ўтказди. “Дарё” мухбири ҳужжатларни мониторинг қилиш давомида харид савдосида қатнашган корхоналар раҳбариятида ўзаро алоқадорлик борлигини аниқлади.
Аввалбошдан, тендер мактабда таҳсил олувчи ўқувчиларни иссиқ овқат билан таъминлаш хизмати учун ўтказилган. Ғолиб корхона 60 кун ичида жами 7274 порция овқат етказиб бериши керак.
Тендерни ютиш учун иккита корхона рақобатлашган. Якунда “Султонбек Нур Бизнес” МЧЖ ғолиб деб топилган (шартнома суммаси — 64,7 миллион сўм), Finance-Counting Center оилавий корхонаси захира етказиб берувчи этиб белгиланган.
Статистика агентлиги маълумотларига кўра, ғолиб корхонанинг 100 фоизлик таъсисчиси Нурматов Раҳматилла Олтмишович ҳисобланади.
Шунингдек, у бир вақтлар ҳозирда фаолият кўрсатмаётган “Дилбар Омад” МЧЖнинг ҳам таъсисчиларидан бири ҳам бўлган. Унинг ушбу корхона бўйича шериги Халқулов Зулфиқор Ўрозқулович бўлиб, у махсус мактаб ўтказган тендерда “Султонбек Нур Бизнес”га, яъни Нурматов Раҳматиллага рақобат уюштириши кўзда тутилган Finance-Counting Center нинг таъсисчиларидан бири ҳисобланади.
Бошқача айтганда, тендерда иштирок этган шахслар бошқа бир, ҳозирда фаолият кўрсатмайдиган корхона орқали бир-бирибга боғланган. Бу эса давлат харидида рақобат муҳити бузилган бўлиши мумкинлигини кўрсатади.
Изоҳ (0)