Миср ҳукумати юборган гепатит C га қарши дори воситаларининг учинчи партияси Ўзбекистонга етиб келди

Миср ҳукумати томонидан Ўзбекистон шифохоналарида фойдаланиш учун инсонпарварлик ёрдами сифатида ажратилган, дунёда кенг тарқалган касалликлардан бири — гепатит C га қарши “Даклатасвир” ва “Софосбувир” дори воситаларининг учинчи партияси Шарм аш-Шайхдан Тошкентга бепул етказиб берди, деб хабар бермоқда “Дунё” АА.

Қайд этилишича, мазкур акцияни Ўзбекистон ТИВ, Қоҳирадаги Ўзбекистон элчихонаси ва Uzbekistan Airways ташкил этган бўлиб, ушбу юкнинг олиб келиниши Ўзбекистон ва Миср ўртасида соғлиқни сақлаш соҳасида ҳамкорликни янада жадаллаштириш, вирусологияда ўзаро қўллаб-қувватлашни ташкил этиш доирасида аввал эришилган келишувларнинг амалий натижасидир.

Умумий қиймати 34930 долларни ташкил этган 17 мингдан ортиқ “Даклатасвир” дори воситалари Ўзбекистон Соғлиқни сақлаш вазирлиги ҳузуридаги Вирусология илмий-текшириш институти томонидан шифоталаб беморларга тақсимланади.

Таъкидланишича, Миср соғлиқни сақлаш вазирлиги билан 2023—2024 йиллар давомида умумий қиймати 4,8 миллион долларлик жами 800 минг дона (40 тоннага яқин) C гепатитига қарши “Даклатасвир” ва “Софосбувир” дори воситаларини юртимизга бепул етказиб бериш бўйича  келишувларга эришилган.

Ушбу дори воситларининг биринчи партияси 29 апрель куни, иккинчи партияси 6 май куни олиб келинганди. 

Апрель бошларида Ўзбекистонда 1 миллион аҳоли вирусли гепатитнинг  B ва C турларига қарши скринингдан ўтказилиши маълум қилинганди. Мазкур текширувларда вирусли гепатит C касаллиги тасдиқланган 10,5 минг нафар беморларда даволаш тадбирлари амалга оширилади.