Toshkent viloyati Olmaliq shahar 6-sonli imkoniyati cheklangan bolalar uchun ixtisoslashtirilgan maxus yordamchi maktabi 4—11-may kunlari boshlang‘ich qiymati 69 million 103 ming so‘mlik tender o‘tkazdi. “Daryo” muxbiri hujjatlarni monitoring qilish davomida xarid savdosida qatnashgan korxonalar rahbariyatida o‘zaro aloqadorlik borligini aniqladi.
Avvalboshdan, tender maktabda tahsil oluvchi o‘quvchilarni issiq ovqat bilan ta'minlash xizmati uchun o‘tkazilgan. G‘olib korxona 60 kun ichida jami 7274 portsiya ovqat yetkazib berishi kerak.
Tenderni yutish uchun ikkita korxona raqobatlashgan. Yakunda “Sultonbek Nur Biznes” MChJ g‘olib deb topilgan (shartnoma summasi — 64,7 million so‘m), Finance-Counting Center oilaviy korxonasi zaxira yetkazib beruvchi etib belgilangan.
Statistika agentligi ma’lumotlariga ko‘ra, g‘olib korxonaning 100 foizlik ta’sischisi Nurmatov Rahmatilla Oltmishovich hisoblanadi.
Shuningdek, u bir vaqtlar hozirda faoliyat ko‘rsatmayotgan “Dilbar Omad” MCHJning ham ta’sischilaridan biri ham bo‘lgan. Uning ushbu korxona bo‘yicha sherigi Xalqulov Zulfiqor O‘rozqulovich bo‘lib, u maxsus maktab o‘tkazgan tenderda “Sultonbek Nur Biznes”ga, ya’ni Nurmatov Rahmatillaga raqobat uyushtirishi ko‘zda tutilgan Finance-Counting Center ning ta’sischilaridan biri hisoblanadi.
Boshqacha aytganda, tenderda ishtirok etgan shaxslar boshqa bir, hozirda faoliyat ko‘rsatmaydigan korxona orqali bir-biribga bog‘langan. Bu esa davlat xaridida raqobat muhiti buzilgan bo‘lishi mumkinligini ko‘rsatadi.
Izoh (0)