“Vagner” xususiy harbiy kompaniyasi asoschisi Yevgeniy Prigojin Rossiya mudofaa vaziri Sergey Shoyguni oxirgi oylarda front chizig‘ining eng qaqshatkich janglari davom etayotgan Baxmut shahriga kelishga chaqirdi. Biznesmenning murojaati 12-may tongida uning matbuot xizmati tomonidan e’lon qilindi.
“Murakkab operativ vaziyat, shuningdek, jangovar harakatlarni olib borishdagi sizning uzoq yillik tajribangizni hisobga olgan holda Rossiya harbiylashtirilgan bo‘linmasi nazorati ostida bo‘lgan Baxmut hududiga kelib, yuzaga kelgan holatni o‘zingiz baholashingizni iltimos qilaman”, — deb yozadi Prigojin.
Xatda, shuningdek, ayni vaqtda “Vagner” yollanma jangchilari Baxmutning 95 foizdan ortiq hududini nazorat qilayotgani va hujumlar davom etayotgani, biroq Rossiya Qurolli kuchlari bo‘linmalari bayroqlari o‘rnatilgan joylarda “dushman qator muvaffaqiyatli qarshi hujumlarni” amalga oshirgani ta’kidlangan.
Yevgeniy Prigojin snaryadlar yo‘qligi sabab jangchilarining Baxmutdagi pozitsiyasini 10-may kuni Rossiya Mudofaa vazirligi bo‘linmalariga topshirishini ma’lum qilgandi. Ko‘p o‘tmay u yollanma jangchilar Baxmutdan ketmasligini aytdi. The Washington Post’ning yozishicha, Rossiya Mudofaa vazirligi “Vagner” rahbarini obro‘sizlantirish rejasini ishlab chiqqan.
Izoh (0)