Тошкентда 9 май куни мушакбозлик ташкил этиладиган боғга вақтинча автобус қатновлари йўлга қўйилади

Хотира ва қадрлаш куни муносабати билан 9 май куни Тошкентдаги Янги Ўзбекистон боғида мушакбозлик уюштирилиши ҳақида хабар қилинган эди. “Тошшаҳартрансхизмат” ушбу боғга вақтинча автобус йўналишлари ташкил этилишини маълум қилди.

Байрам тадбирига ташриф буюрувчи фуқаролар ва йўловчиларга сифатли жамоат транспорти хизматини кўрсатиш мақсадида автобуслар қуйидаги йўналишларда ташкил этилади:

• “Машинасозлар” метроси—Янги Ўзбекистон боғи (10 та жадвал асосида Yutong электробуслари);
• “Дўстлик” метроси—Янги Ўзбекистон боғи (10 та жадвал асосида MAN автобуслари);
• 190-сонли Янгибозор қўрғони—Янги Ўзбекистон боғи (16 та жадвал асосида MAN ва SAZ LЕ-60 автобуслари);
• “Дўстлик” метроси—Янги Ўзбекистон боғи (10 та жадвал асосида Yutong электробуслари);
• "Буюк ипак йўли” метроси—Янги Ўзбекистон боғи (10 та жадвал асосида Yutong электробуслари).

Ушбу автобуслар 9 май куни соат 18:00 дан ҳаракатланишни бошлайди.