АҚШ 9 май куни Украинага янги ҳарбий ёрдам пакети ажратилишини эълон қилиши кутилмоқда. Бу ҳақда Associated Press ва Reuters манбалари хабар берди. Агентликлар маълумотларига кўра, ёрдам ҳажми 1,2 миллиард долларни ташкил этиши мумкин.
Ҳарбий ёрдам пакетидан Hawk ҳаво ҳужумидан мудофаа тизимлари, ҳаво ҳужумидан мудофаа қилувчи қуроллар, гаубицалар, шунингдек, дронларга қарши ўқ-дорилар ўрин олади. Бундан ташқари, АҚШ сунъий йўлдошдан олинадиган суратлар ва турли ўқитиш дастурларини молиялаштиради. Буларнинг барчаси Жо Байден администрацияси маъқуллаган Украина хавфсизлигига кўмаклашиш ташаббуси доирасида молиялаштирилади. Унга кўра, қурол-яроқлар АҚШ захираларидан олинмайди, балки ишлаб чиқарувчилардан сотиб олинади.
Ёрдам пакети эълон қилиниши билан АҚШнинг Украинага 2022 йил февралдан буён кўрсатаётган ёрдами ҳажми 37 миллиард долларга яқинлашади.
Апрель бошида НАТО бош котиби Йенс Столтенберг алянсга аъзо давлатлардан Украинага Комплекс ёрдам пакети учун йилига 500 миллион евродан ажратишни сўраганди. Мартда бўлса АҚШ Украинага 350 миллион долларлик янги ҳарбий ёрдам пакетини эълон қилган эди.
Украинадаги урушда НАТО ёрдами
Шимолий Атлантика алянси кенг кўламли босқиннинг дастлабки кунларидан бошлаб Россияга қарши курашда Украинани қўллаб-қувватламоқда.
Ўтган йил давомида Ғарб иттифоқчилари Украинага 70 миллиард доллардан ортиқ ҳарбий ёрдам кўрсатди, деди Столтенберг.
Аввалроқ НАТО давлатлари Украинага ғалаба қозониши учун зарур бўлган ҳамма нарсани тақдим этишга ваъда берганди.
Изоҳ (0)