Туркия президенти Ражаб Тоййиб Эрдўғон президентлик сайловларига беш кун қолганида давлат хизматчиларининг маошлари оширилишини маълум қилди. Бу ҳақда президент матбуот хизматига таяниб, Daily Sabah хабар берди.
“Биз давлат хизматчиларининг маошларини, жумладан, ижтимоий таъминот улушини 45 фоизга оширмоқдамиз. Шундай қилиб, давлат хизматчилари учун энг кам иш ҳақини 15 минг лирага (тахминан 770 доллар) оширмоқдамиз”, — деди Эрдўғон.
Расмийлар 2023-2024 йилларда 700 мингга яқин давлат хизматчисининг маошини ошириш ниятида. Бундан ташқари, қўшимча иш ҳақи, тунги ишчиларнинг маоши ва фахрийларнинг нафақасини ҳам ошириш режалаштирилган.
Эрдўғон 20 йилдан бери Туркияни аввал бош вазир (2003 йилдан), кейин эса президент (2014 йилдан) сифатида бошқариб келмоқда.
14 май куни мамлакатда президентлик сайловлари бўлиб ўтади. Сўров натижаларига кўра, Эрдўғон уларни бой бериши мумкин. Амалдаги президентнинг асосий рақиби 74 ёшли мухолифат номзоди, Туркия парламенти депутати, Республика Халқ партияси етакчиси Кемал Қиличдароғлудир. Сўровлар шуни кўрсатадики, у ва Эрдўғоннинг ғалаба қозониш имкониятлари тахминан тенг.
Изоҳ (0)