Шавкат Мирзиёев парламент аъзолари, сиёсий партиялар ва жамоатчилик вакиллари билан учрашувда одамлар билан бамаслаҳат иш кўриш чинакам демократия намунаси эканини айтди.
“Қадим тарихимиздан келиб чиққан ҳолда, ота-боболаримизга хос эзгу қадриятларни рўёбга чиқариш, яъни инсон қадрини улуғлаш, унинг ҳуқуқ ва манфаатларини таъминлаш, одамларимиз билан бамаслаҳат иш кўриш биз учун чинакам демократия намунасидир” — дея унинг сўзларини келтирган президент матбуот котиби.
Давлат раҳбари Конституция лойиҳасини муҳокама қилишдан бошлаб то уни қабул қилгунча бўлган даврда ўтказилган умумхалқ муҳокамаларида миллионлаб фуқаролар фаол ва муносиб иштирок этганини қайд этиб, шу нуқтаи назардан янгиланган Конституциянинг чинакам муаллифи халқ бўлди, деб айтишга барча асослар борлигини таъкидлади.
“Энг муҳими, энди ислоҳотларимиз йўлидан ҳеч қачон ортга қайтмаймиз, “инсон—жамият— давлатъъ, деган янги тизим асосида фақат ва фақат олдинга қараб борамиз”, — деди давлат раҳбари.
Президент миллатлараро дўстлик ва аҳилликни сақлаш зарурати ҳақида ҳам гапирди.
“Халқимизда ‘Бирдамлик бор жойда илдамлик бор’, деган доно нақл бежиз айтилмаган. Чиндан ҳам, ўзаро аҳиллик ва ҳамжиҳатлик бўлган юртда, албатта, қут-барака, тараққиёт бўлади. Такрор ва такрор айтаман: бизнинг энг катта бойлигимиз Ўзбекистонни ўзи учун ягона ватан деб биладиган кўп миллатли буюк халқимиздир.
Жонажон юртимизда қарор топган миллатлараро дўстлик ва аҳилликни — мана шундай бебаҳо хазинамизни кўз қорачиғидек асраб-авайлаш барчамизнинг олий бурчимиз эканини ҳар доим ёдда тутишимиз лозим”, — деди Шавкат Мирзиёев.
Изоҳ (0)