Олмалиқда ўзини осиб қўйган ўқувчининг онасига айтган сўнгги сўзлари маълум бўлди

Тошкент вилоятининг Олмалиқ шаҳрида 9-синф ўқувчиси ўз жонига қасд қилгани ҳақида хабар берилган эди. Марҳумнинг онасига айтган сўнгги сўзлари нима бўлгани айтилди. 

Аниқланишича, 21 апрель куни соат тахминан 19:00 ларда йигит бобосининг уйида арқон ёрдамида ўзини осиб, жонига қасд қилган. Мактаб директори унда ҳеч қандай салбий ҳолат кузатилмаганини таъкидлаган. 

“21 апрель Ҳайит куни бўлган. 20 апрель куни ҳам уни ўртоқлари билан бирга кўрганман. Унда ҳеч қандай салбий ҳолат кузатилмаган”, — дейди у ўқиган мактаб директори.

Марҳумнинг онаси эса воқеа содир бўлган куни ўғли унга қўнғироқ қилганини, яхши кўришини айтганини таъкидлади. Аёл ўғлининг жонига қасд қилишига сабаб бўладиган бирор воқеа содир бўлмаганини қайд этган. 

“Оилада уруш-жанжал бўлади, лекин болаларимиз олдида уришмас эдик. Ҳодисага нима сабаб бўлганини биз ҳам билмаяпмиз. Бобосининг уйига икки дўсти билан борган. Учови телефон ўйнаб ўтирган. Кейин соат 19:00 ларда улар суриб-суриб чиқарган. Отаси ичкарида ухлаётган бўлган. Отасига биз кетдик, дейишган. Учови кетди, деб ўйлаган отаси. У эса уйда қолиб кетган.

Ўғлим менга яна телефон қилди қайтадан. Она, бу ердан соат тўртларда чиқиб кетган экансиз, уйга бунча кеч боряпсиз, деди. Бувисининг ёнига борганимни айтдим. Тузукмисиз, она, йиғладингизми, деди. Ҳа, сал йиғладим, қон босимим кўтарилди, бувингни соғиндим, деб айтдим. Ҳозир бораман, она, сизни яхши кўраман, деди. Шу охирги гапи бўлди. Болам жуда кўп марта яхши кўришини айтарди. Она, ишламанг, соғлиғингиз яхши эмас, мен сизнинг суянчиғингизман, менга бемалол суянаверинг, деб айтар эди. Шу унинг охирги гаплари бўлди.

Дадамдан сўрасам, ўйнаб-кулиб яхши келганини, дўстлари билан ош еганини, ўйнаб ўтирганини айтди. Телефонини текшириб турар эдим, бирор қиз билан муносабатда эмасди”, — дейди аёл.

Айни пайтда ҳолат юзасидан шаҳар прокуратураси томонидан терговга қадар текширув ҳаракатлари олиб борилмоқда.