Milliardga yaqinlashgan ko‘rishlar, million tomoshabin, 114 kunlik konsert. Davron Kabulov “Million”ning 10 yil davomida erishgan yutuqlari haqida (video)

“Million” kulgi jamoasi yetakchisi Davron Kabulov “Daryo”ga bergan intervyusida shu kungacha erishgan yutuqlari, hamda jamoaga qimmatga tushgan tomoshalar haqida gapirdi. 



— San’atkorlar orasida gapirishni xohlaydiganlar shundoq ham kam emas. Fikrimcha, biz gapirishimiz kerak emas, bizning natijalarimiz gapirilishi kerak. O‘tgan 10 yil ichida ‘Xalqlar do‘stligi’ san’at saroyida 114 kun konsert berilgan. Yarim millionga yaqin tomoshabin mana shu konsert zalidan turib tomosha qilgan. Qo‘shni respublikalar, viloyatlar, amfiteatrlar va boshqa saroylardagi konsertlarni qo‘shib hisoblansa ‘Million’ning tomoshabinlari milliondan oshibdi. YouTube orqali ko‘rishlar soni esa milliardga yaqinlashmoqda. Bu ham nazarimda kichkina natija emas. Bu hammasi budjetdan bir so‘m pul olmaydigan jamoaning natijalari. 12 kishilik, birovdan yordam kutmaydigan, kezi kelsa, ayrim mutasaddilar cho‘qilashni yaxshi ko‘radigan jamoaning natijalari. O‘ylaymanki, ikkinchi o‘n yillikda ‘Million’ yangicha ko‘rinishda sahnaga chiqadi. Chunki jamoada eng uzoq vaqt faoliyat yuritgan Mirkomil Musayev mana shu konsert orqali faoliyatlarini yakunlayaptilar.  

— Mirkomil Musayevni jamoada olib qolish uchun qanday harakatlar qildingiz?

— Mirkomil Musayevni jamoada olib qolish uchun 5 yildan beri harakat qilaman. 2018-yilda ‘Bo‘ldi, endi, jamoadagi faoliyatimni yakunlamoqchiman’, deganlarida ‘Aka, jamoadagi yangi yigitlarga moslashib olishlariga yordam bering’, deganman. Shunda ’bo‘lmasa, keyingi yil‘, deb cho‘zilib-cho‘zilib, 2023-yilda ketadigan bo‘ldilar. Tanganing ikkinchi tomoni bor, ularning ham qarorlarini hurmat qilishimiz kerak. Jamoadan qaysidir ishtirokchi chiqib ketadigan bo‘lsa, u albatta urish-janjal bilan, Davron bilan urishib chiqib ketavermaydiku?  

— Faoliyatingiz davomida jamoaga qimmatga tushgan sahna ko‘rinishlari bo‘lganmi?

— 2016-yilda Kaniza bilan sahna ko‘rinishi ‘Million’ning minusiga ishlagan. Kulgi jamoasining ijodiga e’tibor beradigan bo‘lsa, o‘z dasturiga eng yaxshi san’atkorlarni taklif qilishga intiladi. Masalan, Farruh Zokirov, Yulduz Usmonova, Ozodbek Nazarbekov, ”Bolalar” guruhi, Jahongir Otajonov. Bular hammasi san’ati muhokama qilinmaydigan san’atkorlar. Kanizani yumor qilish nuqtayi nazaridan taklif qilgan edik. Xonandaning o‘zi yo‘q joydan muammo yasagan. 

“Million” kulgi jamoasining yangi konsertidan reportajni quyida to‘liq tomosha qilishingiz mumkin.