“Ўзи билан ўзи гаплашадиган бўлиб қолди”. Саида Раметова Альцгеймер касаллигига чалинган турмуш ўртоғи Жумадулла Раметов ҳақида (видео)

Ўзбекистонда хизмат кўрсатган артист Саида Раметова “Shok.uz” YouTube каналига берган интервьюсида Альцгеймер касаллигига чалинган турмуш ўртоғи Жумадулла Раметовнинг касалхонада эканлиги ҳақида гапириб берди.

— Турмуш ўртоғим 10 кун уйда бўлди, сал мазаси бўлмаганидан кейин касалхонага ётқиздик. Улар Альцгеймер касаллигига чалинган, аҳволи бир яхши бўлиб, кейин асабийлаша бошлайди. Ўзи билан ўзи гаплашадиган бўлиб қолди. Асабийлашганларидан кейин шифокорлар билан маслаҳатлашдик. Шифокорлар бу касалликка чалинган беморларнинг атрофида кўп инсон бўлмаслиги кераклигини, акс ҳолда улар асабийлашишини айтди. Жим ўтирган эдилар, кейин шифокорга боришга мажбур бўлдик. Шифохонада уч-тўрт кун бўлади, — дейди актриса.

Аввалроқ Саида Раметова турмуш ўртоғининг карантин вақтида ушбу касалликка чалингани, аҳволи оғирлашиб қолгани ҳақида сўзлаб берган эди.

— Карантин авжига чиққан пайтида Жумадулла ака бу касалликка чалинганини билдик. Аммо мен у пайтда Туркияда “Мендирман Жалолиддин” сериалининг сёмкасида эдим. Ўғилларим дадасини дарров касалхонага олиб борган. Аммо у пайтда беморларнинг кўплигидан касалхоналарда бўш жой йўқ экан. Азиз ўғлим кунда қўнғироқ қилиб, “Нима қиламиз, аҳволлари оғир”, деди.

Узоқда бўлганим учун қўлимдан ҳеч нарса келмади. Ундан кейин ўзимга ҳам саратон хасталиги ташхисини қўйишди. Кетма-кет келган дард оиламизни шошириб қўйди.

“Мен театрга ишга бормаяпман, ойлигимни олиб ташлашсин, ёшларга беришсин”, дейди. Шунча йил ишладингиз, озгина сийлашса нима қилибди, десам ҳам унамаяпти. Мен тўй хизматлари ёки сёмкалар сабаб театрга боролмаган кунларим бўлган. Аммо Жумадулла Раметов бирор марта театрга хиёнат қилмаган инсон.

Мен касалликка таслим бўлганим йўқ, насиб қилса турмуш ўртоғим ҳам бу дардни енгиб ўтади. Бунинг учун оиламиз билан курашяпмиз, — дейди Ўзбекистонда хизмат кўрсатган артист Саида Раметова.