Қозоғистон нега “Толибон” билан ҳамкорлик қилаётганига изоҳ берилди

Қозоғистон ва Афғонистон ўртасидаги товар айирбошлаш ҳажми 1 миллиард долларга етди. Бу ҳақда республика бош вазир ўринбосари, савдо ва интеграция вазири Серик Жумангарин хабар берди.

“Дарё”нинг Қозоғистондаги мухбири вазир нутқига таяниб, икки давлат ўртасидаги савдо алоқалари янада ошишини маълум қилди. Серик Жумангарин Қозоғистон бундай имкониятдан воз кечмаслиги кераклигини билдирди. Ҳукумат расмийси бундан ҳам кўпроқ, иқтисодий мақсадлар учун янги алоқаларни ўрнатиш кераклиги, бунда сиёсат ва савдо бир-биридан ажралиб туришини айтди.

“Сиёсат сиёсат йўлида, иқтисод эса иқтисоддир. Биз ушбу савдо ҳамкорлигини оширамиз. Бизда буғдой, ун ва кунгабоқар ёғи етказиб беришнинг реал истиқболлари бор. Нега бу имкониятдан воз кечишимиз керак? Бу пировардида давлатимизга фойда келтиради”, — деди Жумангарин.

Савдо вазирлиги раҳбари афғон ишбилармонларини Қозоғистонга мамлакат бозорини кўриш ва ўрганиш учун таклиф қилмоқчи эканини айтди.

“Афғон ишбилармонларини шу ерда бизнес-форум ўтказишга таклиф қилмоқчиман. Улар Қозоғистонни, бизнинг имкониятларимизни кўрсин. Охирги марта Афғонистонда нафақат маҳсулот билан шуғулланувчиларни, балки ер қаъридан фойдаланувчиларни ҳам олиб бордик. Чунки у ерости бойликларидан фойдаланиш жиҳатидан анча бой мамлакат. Уларда бунга қизиқиш уйғонди”, — дейди Жумангарин.

Унинг қайд этишича, Қозоғистон аллақачон Афғонистонда савдо уйини очган ва ўз вакилини тайинлаган. Эслатиб ўтамиз, аввалроқ Қозоғистон расмийлари афғон дипломатларини аккредитациядан ўтказишга рухсат берган эди.

Талгат Сатибалди, Остона