“Қичқириб ташладингиз, менга ёқмади дейишган”. Дилшода Рустамжонова ижодий имтиҳондаги масали учун икки олгани ҳақида (видео)

Актриса Дилшода Рустамжонова YouTube’даги “Дарё Лайфстайл” каналига берган интервьюсида устозининг танбеҳи сабаб масаллар устида ишлагани, кадрда чиройли кўриниш учун ўзини чекламаслиги ва бўлажак турмуш ўртоғи ҳақидаги саволларга жавоб берди. 

— Ўзбекистон давлат санъат ва маданият институтига киришда ҳар бир абитуриент ҳеч бўлмаганда битта масални айтиб бериши керак. Ижодий имтиҳонда бунга алоҳида эътибор берилади. Мен ҳам институтга ҳужжат топширмасимдан аввал қўғинчоқ театрида ишлайдиган устозим Мирзоҳид Жумабоевдан масал айтиш санъатини ўрганганман. 

Аммо иккинчи курсда таҳсил олаётганимда “Саҳна нутқи” фани устозим Дилрабо Жуманова “Менга айтган масалингиз ёқмади, қичқириб ташладингиз”, деб икки баҳо қўйган. Ўшанда “Ҳали кўрасиз, зўр масаллар айтаман”, деб дилимга тугиб қўйгандим. Масал ёдлашни яхши кўраман. Қанча масал билишимни ўзим ҳам билмайман. Чунки менга ёд олиш унчалик қийинчилик туғдирмайди. 
Бир куни кўрсатувлардан бирига меҳмон сифатида таклиф қилишди. Бошловчи бирор нарса ижро этиб беринг деганда масал айтиб бергандим. Хуллас, ана шундан кейин ижройимдаги масаллар кўпчиликка ёқиб қолди. Ҳозир қаерга борсам, масал айтиб беришимни сўрашяпти.
Масал айтишни Валижон Шамсиев бошлаб берган экан. Сўнгги йилларда саҳналарда айтилмагани учун халқ соғинганми билмадим жуда илиқ қарши олишди, — дейди Дилшода Рустамжонова.

Актриса рол ижро этаётганда ўзига маълум чекловлар қўймаслиги ва табиийликни қадрлаши ҳақида ҳам айтиб ўтди.

— Менда кадрда хунук кўриниб қолсам-чи, деган қўрқув йўқ. Шу боис ўзимга ҳеч қандай чеклов қўймайман. Шернинг ролини ўрнаётган бўлсам оғзимни катта очиб нара тортишим ёки қуёндек ғилай бўлишим мумкин. Кейин табиийликка алоҳида эътибор бераман. Табиий қиёфадаги инсоннинг ролга мослашиши ҳам осон бўлади. Афсуски, кейинги пайтларда сунъий юзлар кўпайиб кетди. Режиссёр Зулфиқор Мусоқов “Новда” фильмига актриса танлаётганда Раъно Шодиевага “Юзингни ювиб чиқ” деган экан. Актриса сепкиллари борлигини айтса ҳам юзини ювдириб, кейин кастингдан ўтказган экан. Мен ҳам ҳеч қачон юзимга ортиқча безак бермайман деб ният қилганман, — дейди актриса Дилшода Рустамжонова.

Актриса турмушга чиқаётгани ва турмуш ўртоғи билан “Қувноқлар ва зукколар” лойиҳасида иштирок этаётганида танишгани ҳақида сўзлаб берди.

— Бўлажак турмуш ўртоғим билан 2019 йилнинг 15 май куни ЎзМУнинг маданият саройида ўтказилган “Қувноқлар ва зукколар” мусобақасида  танишиб қолганмиз. Аммо у инсон менда унчалик яхши таассурот қолдирмаган. Кейинчалик у инсон билан бир гуруҳда иштирок этадиган бўлдик ва муносабатларимиз ака-сингилдек эди. Ҳақиқатан ҳам муносабатларимиз ака-сингилдек самимий эди. Бу орада у инсон ўқиш учун Қозоғистонга кетди мен эса ижод билан овора бўлиб қолдим. Кўп муддат умуман гаплашганимиз йўқ. У инсон мендан 6 ёш катта, феъл-атвори ҳам бутунлай бошқача. Мен шаддод, ғайратли бўлсам у анча сокин. Хуллас, 2022 йилга келиб у инсон уйланадиган бўлиб, оналарининг тавсиясига кўра мен билан яна боғланди. Чунки бўлажак қайнонам жуда яхши инсон, менимча ўғлига мени мақтаган. У инсон ёлғиз ўғил, санъатимни тушунадими йўқми деб бироз иккилангандим. “Вазиятга қараб иш тутамиз, санъатингизни қадрлайман”, деганидан кейин рози бўлдим. Энг қизиғи, оилаларимиз ҳам бир кўришгандаёқ бир-бирига маъқул келишди, — дейди актриса Дилшода Рустамжонова.