Ўзбекистонда хизмат кўрсатган артист Рашид Холиқов 28 апрель куни 50 ёшни қаршилади. Ҳозирги кунда ўзбек шоу-бизнесининг етакчи классик хонандаларидан бири ҳисобланган Рашид Холиқов ҳаётда кўплаб қийин кунларни бошидан ўтказган. Унинг машаққатларга тўла муваффақият йўли ҳақида қуйида ҳикоя қилинади.
“Онам татар миллатига мансуб эди”
Хонанда Тошкентнинг Чорсу даҳасида дунёга келган. Унинг ота-онаси беш нафар фарзанд кўрган. Бироқ фарзандларининг бири оламдан ўтганидан сўнг Рашид Холиқов оиланинг кенжасига айланган. Хонанданинг онаси татар миллатига мансуб аёл бўлган.
— Дадам раҳматли соф ўзбекона хонадонда улғайган бўлса-да, рус миллатига мансуб инсонлар билан ишлагани учун замонавий фикрларди. Онам билан қандай танишганини билмайман, аммо онам келин бўлиб тушганида ҳатто ўзбек тилини ҳам яхши билмагани ҳақида эшитгандим. У оиласи билан Қозон шаҳрида яшаган ва қандайдир сабабларга кўра отам билан танишиб қолган. Шундай бўлса-да, онам ўзбек келинларидан кам эмасди. Тўрт фарзандни олдига олиб ‘Сенлар яхши бола бўлишинг керак, бўлмаса дадангнинг юзи ерга қарайди’, деган гапни кўп гапирарди, — дейди хонанда.
“Отам муҳандис, онам эса ошпаз бўлган”
Рашид Холиқовни кўпчилик зодагон, бой инсоннинг фарзанди деб билади. Аслида унинг отаси оддий муҳандис, онаси эса боғчада ошпаз бўлиб ишлаган. Хонанда болалигида оиласи моддий жиҳатдан кўп қийналганини яхши эслайди.
— Дадам раҳматли каноп ип ишлаб чиқарадиган цехда оддий муҳандис бўлиб ишлаган. У пайтлари ойликка ишлайдиган одамларнинг даромади яхши бўлмагани аниқ. Дадам эрталабдан кечгача ишласа-да, рўзғоримиз ҳаминқадар бўларди. Онамнинг эса биттагина жемфери бўларди ва унинг ҳам енгига катта-катта ямоқ солинганди. Онам ҳам бошқа аёллар сингари шуба палто кийишни ва тилло занжир тақишни орзу қиларди. Афсуски, рўзғордан ортириб ўзига бирорта кийим ҳам ололмасди, — дейди хонанда.
“Онамга мендан воз кечишни маслаҳат беришган”
Хонанда онасининг тўртинчи фарзанди бўлган. Аммо шифокор ҳомила онанинг саломатлигига салбий таъсир этиши ва ундан вақтида воз кечишни маслаҳат беришган.
— Онамга ҳомиладан воз кечишни маслаҳат беришган. У поликлиникадан йиғлаб уйга қайтаётганида маҳалламиздаги бир аёл “Ҳали кўрасиз мана шу қорнингиздаги бола машҳур бўлиб, кўп пул топади ва сизга раҳмат олиб келади”, деган экан. Ўшанда фаришталар омин деган экан, туғилишим онамнинг саломатлигига салбий таъсир этмади, — дейди хонанда.
“Ҳали кўрасиз шунақа танилиб кетаман…”
Рашид Холиқовнинг оиласида санъаткорлар йўқ, аммо отаси ва аммалари болаликдан дутор чалиб қўшиқ айтишга қизиқишган экан. Аммо оила аъзолари Рашид Холиқовнинг санъаткор бўлишини унчалик исташмаган.
— Санъаткор бўлишимга қаршиликлар бўлган, аммо барибир қизиқишим устунлик қилган. 1987 йилдан бошлаб, ансамбл ташкил этиб, тўй хизматларига чиқишни бошлаганмиз. Аммо энг қизиғи маҳалламиздаги одамлар бизга тўйларини ишонишмасди. Тўй қиладиган бўлишса бошқа маҳалладаги биздан расвороқ санъаткорни айтишарди-ю, биз хизмат қилайлик десак ишонишмасди. Кўз олдиларида ўсган бола тўйни қандай ўтказади, деб ўйлашган бўлса керак-да. Қўшиқларимиз диско услубида бўлгани учун бошқа маҳалладаги тўйларга таклиф этишарди. Бир куни қўшниларимиздан бири ўғлини уйлантирадиган бўлди. Мени хонанда сифатида тўйга таклиф қилмаганида хафа бўлиб, “Ҳали кўрасиз шунақа танилиб кетиб, илтимос қилсангиз ҳам тўйингизда қўшиқ айтмайман”, дегандим, — дейди хонанда.
Омад келтирган “Шаҳло кўзли маликам”
1990 йили Рашид Холиқов акаси билан биргаликда “Шаҳзод” ансамблини ташкил этади. Аммо анча вақтгача ўз йўналишини топишолмайди. “Шаҳло кўзли маликам” қўшиғи эса унга оз бўлсада машҳурлик олиб келади.
— Ижодни жуда эрта бошлаганман, аммо 1995 йилга бориб одамлар хонанда сифатида таний бошлашган. Чунки у пайтларда ижтимоий тармоқлар йўқ, клиплар ҳам онда-сонда телевидениеда намойиш этиларди. Альбом яратиб, уни “қароқчилар” қўлига ўзимиз олиб борардик. Чунки улар кассеталарга ёзиб, бозорларда баланд қилиб қўйишар эди, — дейди хонанда.
“Қайнонамнинг дарвозасини тепиб чиқиб кетганман”
Хонанданинг оила қуриши жуда қизиқ кечган. У турмуш ўртоғи Саида Холиқова билан тўйда танишиб қолган ва кейинчалик уларнинг танишуви “Йўқ-йўқ” клипининг яратилишига сабаб бўлган.
— Аёлим билан 1992 йили опасининг тўйида танишиб қолганмиз. Ҳамма ёшлар сингари биз ҳам кўришиб, телефонда гаплашиб бир-биримизга боғланиб қолганмиз. Бир куни онаси мен билан учрашмоқчи эканлигини айтиб қолди. Борсам “Тўйдан топган пулларингиз билан қизимни боқмоқчимисиз?” деган гап билан кутиб олишди. Роса жаҳлим чиққан, ғурурли йигит эдим “Қизингиз ҳам, ўзингиз ҳам бор бўлинг”, деб дарвозани тепиб чиқиб кетганман. Эртаси куни Саиданинг уй телефонига қўнғироқ қилсам “Онам анча жаҳлдан тушди, балки келарсиз”, деди. Бозордан катта гулдаста олиб яна қайнонам билан учрашгани келганман. Ҳақиқатан ҳам анча ҳовури босилган, гулни қўлимдан олгач, оқ фотиҳа берган, — дейди Рашид Холиқов.
“Ўйнайсан” клипи янгилик бўлган
Рашид Холиқов энг қиммат клип оладиган ўзбек хонандалари сафига киради. Маълумотларга қараганда, унинг “Ўйнайсан” қўшиғига ишланган клип ўзбек санъатидаги графикадан фойдаланилган биринчи клип сифатида эътироф этилади.
— Кам қўшиқ яратаман, клипларим ҳам у қадар кўп эмас. Аммо сифатли маҳсулот яратишга ва у одамлар хотирасида қолишини истайман. “Ўйнайсан” клипини корейс миллатига мансуб режиссёр олган. Яшил фонда олинаётган саҳналарни кўриб ҳеч нарсага тушунмаганман. У пайтлари мен тугул бошқалар ҳам графика нима эканлигини билмасди. Клип жуда катта маблағ эвазига олинган, унинг монтаж ишлари ҳам узоқ давом этган, — дейди хонанда.
“Оёғингизни кесиш керак, дейишган”
2013 йили хонанданинг ҳаётида кутилмаган воқеа содир бўлди. У дўстлари ва оила аъзолари билан Бали оролига дам олгани борганида ҳашарот чақиши натижасида саломатлигига жиддий шикаст етди. Миш-мишларга қараганда, шифокорлар унинг жароҳатланган оёғини кесмоқчи ҳам бўлишган.
— Ҳашарот чаққанини анча кеч билганман. Саёҳатдан қайтгач, Тошкентдаги шифокорларга кўрсатсам аниқ ташхис қўйишолмаган. Бир профессор ҳашарот чақишидан ташқари оёғимда шамоллаш ҳам борлигини айтган. Иссиқ муолажалар қилгач, касаллик янада зўрайиб кетган. Саккиз ой мобайнида тўшакка михланиб қолганман. Оёқни кесиш керак, ёки букилмайдиган қилиб операция қилиш керак деган гаплар бўлганидан кейин германиялик шифокорларга мурожаат қилишга мажбур бўлганман. Улар ҳавотирга тушмаслигимни ва касалликни даволаш имкони борлигини айтишган. Авваламбор, Яратганнинг инояти ва хорижлик шифокорлар сабаб бўлиб ҳаётга қайтганман, — дейди хонанда.
Хонанданинг тўрт нафар фарзанди бор. Санжар ва Ислом исмли ўғиллари оила қурган ва фарзандли бўлишган. Санжар бир пайтлар отасининг касбини давом эттирмоқчи эди. Аммо унинг фаолияти узоққа чўзилмади ва санъатни тарк этиб, ўзини бизнес соҳасига бағишлади.
Хонанда келинларни ардоқлайдиган инсон. У илк марта бобо бўлганида рафиқасига ва келини Файрузага қимматбаҳо автомобиллар совға қилган эди.
Изоҳ (0)