Сирдарёда ўзганинг 5 сотих ерини 7,4 минг АҚШ долларига сотишга уринган шахс ушланди

Сирдарё вилояти Оқолтин туманида ноқонуний равишда ер майдонини сотмоқчи бўлган шахс қўлга олинди, деб хабар беради Бош прокуратура ҳузуридаги департамент.

Қайд этилишича, департамент ҳамда ДХХнинг Оқолтин тумани бўлимлари томонидан тезкор тадбир ўтказилган. Унда С.Х. исмли шахс фуқаро Ў.А.нинг ишончига кириб, “Баҳор” МФЙдаги бошқа бир фуқаронинг 10 сотихли деҳқон хўжалиги ер майдонининг 5 сотихини гўёки кадастр бўлимида ишловчи танишлари орқали унинг номига расмийлаштириб олиб беришни ваъда қилгани аниқланган. У “хизмати эвазига” 7,4 минг АҚШ долларини олган вақтида ашёвий далиллар билан ушланган.

Мазкур ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.

Аввалроқ Навоийда 80 гектар ерни 1 млрд сўмга сотишга уринган шахслар қўлга олингани, Самарқанд ва Фарғонада ноқонуний ер сотиш ҳолатларига чек қўйилгани тўғрисида хабар берилганди.