ДХХ Қашқадарё вилояти бўйича бошқармаси томонидан вилоят ИИБ ҳамда Бош прокуратура ҳузуридаги департамент ходимлари билан ҳамкорликда бир нечта тезкор тадбирлар ўтказилди, деб хабар беради ЎзА.
Жумладан, Косон туманидаги фермер хўжалиги раҳбари 49 йил муддатга ижарага берилган 50 гектар ер майдонини харидор номига расмийлаштириб бериш эвазига 1,2 миллиард сўм талаб қилиб, олдиндан 590 миллион сўм олган вақтида ушланган.
Касби туманида ўтказилган тадбирда эса фермер хўжалиги раҳбари таниши билан биргаликда, мазкур хўжаликнинг пахта ва ғалла етиштиришга мўлжалланган 35 гектар ер майдонини 1,2 миллиард сўмга сотишга келишиб, олдиндан 380 миллион сўм олган вақтида қўлга олган.
Шунингдек, Касби туманида қайд этилган яна бир ҳолатда фермер хўжалиги иш юритувчиси мазкур хўжалик раҳбарининг ишончини суиистеъмол қилиб, 14 гектар ер майдонини 130 миллион сўмга сотган вақтида ушланди. Ушбу ер майдонини расмийлаштириб беришни ваъда қилган туман Қишлоқ хўжалиги бўлими ходими 5 миллион сўм олганида ушланган.
Бундан ташқари, Сирдарёда яшовчи 43 ёшли эркак фермер хўжалиги ташкил этиши учун ажратилган 4,5 гектар ер майдонини 30 минг долларга сотишга келишиб, олдиндан 20 минг доллар олган вақтида ушланган.
Аввалроқ Давлат хавфсизлик хизмати Андижон ва Сирдарёда ер майдонлари ноқонуний сотилишининг олдини олганди. Шунингдек, 2022 йил ноябрда Сурхондарё вилоятининг Денов туманида фермер хўжалиги раиси ўзи раҳбарлик қилаётган фермер хўжалигига тегишли бўлган ерни сотмоқчи бўлганида қўлга тушган эди.
Изоҳ (0)