Халқаро футбол федерацияси (ФИФА) президенти Жанни Инфантино 5–6 май кунлари Ўзбекистонга ташриф буюради. Бу ҳақда ЎФА матбуот хизмати маълум қилди.
Инфантино бошчилигидаги делегация ташриф давомида Ўзбекистондаги футбол инфратузилмаси билан танишади ва ФИФА билан ҳамкорликда ташкил этилаётган терма жамоалар базасини (“Дўстлик”) кўздан кечиради. Шунингдек, ФИФА раҳбари ЎФА мутасаддилари билан учрашувлар ўтказади.
Қайд этиш керак, Жанни Инфантино ФИФА президенти сифатида Ўзбекистонга илк бор ташриф буюради. 2017 йил Инфантино Ўзбекистонга бориш ниятида эканини айтган, бироқ бу ташриф амалга ошмаганди.
Аввалроқ Инфантино Марказий Осиё футбол ассоциацияси (CAFA) конгрессида қатнашиш учун 1 май куни Тожикистонга ташриф буюриши маълум бўлганди. Катта эҳтимол билан функционер Марказий Осиёга ташрифи жараёнида Тожикистондан кейин Ўзбекистонга келади.
Марказий Осиё терма жамоалари иштирокидаги CAFA мусобақасига Ўзбекистон ва Қирғизистон мамлакатлари мезбонлик қилади. Мусобақа 9—21 июнь кунлари ўтказилади.
Изоҳ (0)