Тошкентга келтирилган янги автобуслар берилиши учун ҳайдовчилардан пул талаб қилинаётгани ҳақидаги хабарлар рад этилди

“Тошшаҳартрансхизмат” янги автобуслар учун ҳайдовчилардан пул талаб қилинаётгани ҳақида ижтимоий тармоқларда тарқалган хабарларга муносабат билдирди.

Facebookъда жойланган постда “7-автобус саройи” филилали тасарруфидаги 94 ва 98-сонли автобус йўналишларига бириктирилган янги автобусларни олиш учун ҳайдовчилардан 150-200 доллар пул талаб қилинаётгани айтилган. “Тошшаҳартрансхизмат” матбуот хизмати бунга жавобан фактларга асосланмаган маълумотларни тарқатмасликни сўради.

Қайд этилишича, ҳозирда “Жамоат транспорти тизимини ислоҳ қилиш чора-тадбирлари тўғрисида”ги президент қарорига асосан, “Тошшаҳартрансхизмат”АЖ ва филиаллари тасарруфига харид қилинаётган янги Yutong ва Кинг Лонг русумли йўловчи ташувчи автобусларни ҳайдовчиларга бириктириш бўйича махсус буйруқ қабул қилинган бўлиб, ушбу буйруққа асосан “Ҳайдовчиларни ишга қабул қилиш ҳамда уларни автобус ва электробусларга бириктириш бўйича низом” тасдиқланган.

Ушбу низом асосида Автобус саройи филиалларининг ҳар бирида Ички ишлар ходими, Ҳаракат хавфсизлиги бошқармаси (ҲХБ) ходими, бош муҳандис, таъмирлаш устахонаси бошлиғи ва тасарруф бўлими ходимларидан ташкил топган ишчи гуруҳ аъзолари томонидан ҳайдовчиларни янги автобус ва электробусларга бириктиришда очиқ суҳбат ўтказилиб шаффофлик ва ҳалоллик принципларига таянган ҳолда суҳбат жараёнлари онлайн видео тасвирга олувчи мосламада тасвирга олиб борилмоқда.

“Бунда ҳайдовчиларни бир нечта устивор тамойиллар асосида автобусларга бириктириш белгиланган, яъни, масъул ходимлар томонидан эътиборга молик томонлар ҳайдовчининг сўнгги уч йил мобайнида содир этган қоидабузарликлари ва йўл-транспорт ҳодисалари, муқаддам бошқарган транспорт воситаларининг таъмирлаш ишларида фаоллиги ҳамда сўнгги уч йил мобайнида ҳайдовчи томонидан йўналишда йўловчиларга нисбатан қўпол муносабатда бўлган ёки йўқлиги яъни, “Тошшаҳартрансхизмат”нинг қисқа 1062 ишонч телефони орқали келиб тушган мурожаатлар инобатга олинган ҳолда энг яхши ва юқори кўрсаткичларга эга бўлган ҳайдовчилар янги харид қилинаётган автобусларга бириктирилаётганини маълум қиламиз”, — дейилади муносабатда.

Шунингдек, коррупсион ҳолатлар мавжудлигини тасдиқловчи фактларга асосланган маълумотлар мавжуд бўлса “Тошшаҳартрансхизмат”нинг Коррупцияга қарши курашиш бўлимига +998 (71) 230-71-05 мурожаат қилиш мумкинлиги қўшимча қилинган.

Ҳар бир ҳолат бўйича хизмат текшируви эълон қилиниб, текширув натижалари бўйича расмий муносабат бериб борилади.