Андижон вилояти, Балиқчи туманида шаръий никоҳдаги иккинчи турмуш ўртоғини бўёқ суюлтиргич билан ёқиб юборган эркак 17 йилга озодликдан маҳрум этилди. Бу ҳақда “Дарё”га Жиноят ишлари бўйича Балиқчи туман судининг раиси Фурқат Собиров маълум қилди.
Аниқланишича, судланувчи Қаҳрамон Хотамов (исм шарифлар ўзгартирилган) шаръий никоҳидаги иккинчи турмуш ўртоғи Динара Саидованинг яшаш уйига келиб, уйда ҳеч ким йўқлигига ва хотини ётоқхонада бир ўзи ухлаб ётганига ишонч ҳосил қилгач, унинг уйқуда бўлганидан фойдаланиб, қўлида бўлган бўёқ суюлтиргич моддасини унга сепган. Динара ушбу ҳолатдан қўрқиб уйғонган вақтида қўлидаги ёндиргич билан уни ёқиб юборган. Марҳума олов алангасидан талвасага тушиб, ўзини қутқариш мақсадида уй ҳовлисига югуриб чиқиб, елим идишдаги сувни ўз устига қуйиб, оловни ўчиришга уринган. Бироқ Қаҳрамон ўзининг жиноий мақсадини охирига етказиш мақсадида яна бир бўёқ суюлтиргични жабрланувчининг устига сепиб ёқиб юборган. Аёл ўз жонини сақлаб қолиш мақсадида елим идишдаги сувни яна эгнидан қуйиб, кўчага қочиб чиққан ва қўшнисининг хонадонига яширинган. Аммо кўрсатилган тиббий ёрдамга қарамасдан олган жароҳатлари туфайли орадан 13 кун ўтиб шифохонада вафот этган.
“Динара билан 2017 йилнинг сентябрь ойида пахта терим пайтида танишганмиз. Сўнгра муносабатларимиз яқинлашгач, Динаранинг розилиги билан шаръий никоҳ асосида турмуш қурганмиз. Бирга яшаган давримиз мобайнида пул юзасидан турли келишмовчиликлар чиққан бўлса тез ярашиб олардик. Албатта, доимий равишда сўраган пулларини бериб турардим. Ишларим юришмай қўйгач, бунинг имкони бўлмай қолди. Натижада сўнгги пайтларда менга нисбатан унинг хатти-ҳаракати ва муносабатлари ўзгарди.
Ҳаттоки, телефон рақамимни қора рўйхатга киритиб, қўнғироқларимга жавоб ҳам бермай қўйди. Пулим борлигида яхши, ишим юришмай қолганида эса ўзини узоқлаштираётганини кўриб, уни ўлдириш фикри хаёлимга келди. Шу сабабли режамни амалга ошириш мақсадида юз берган воқеани амалга оширдим. Айбимни тан оламан, қилмишимдан пушаймонман”, — дейди судланувчи.
Шунингдек, суд муҳокамасида Қаҳрамон Хотамов 2020 йилнинг март ойда фуқаро Отабек Шавкатов ишончига кириб, унга Бўстон туманида балиқ маҳсулотлари музлатиб сотиш билан шуғулланиш учун 4 минг АҚШ доллари кераклигини, агар бериб турса 1 ойда қайтариб беришини айтиб, сўнгра олган пулларни қайтармаслик мақсадида турли баҳоналарни важ қилиб 2020 йилнинг апрель ойидан декабрь ойига қадар ундан жами 14 минг АҚШ доллари фирибгарлик билан қўлга киритгани аниқланган.
Суд ҳукми билан Қаҳрамон Хотамов Жиноят кодексининг 97-моддаси 2-қисмининг “ж” банди ҳамда 168-моддаси 3-қисмининг “а” бандида назарда тутилган жиноятларни содир этганликда айбли деб топилган. Унга нисбатан узил-кесил ўташ учун 17 йил 6 ой муддатга озодликдан маҳрум қилиш жазоси тайинланган.
Шунингдек, Қ.Ҳ.дан жабрланувчи А.Х. фойдасига жами 12.500 АҚШ доллари миқдорида моддий зарар ундириш белгиланган.
Изоҳ (0)