Ўзбекистон ҳарбийлари АҚШдаги мусобақада ғолиб бўлди

Мудофаа вазирлиги ҳарбий хизматчилари АҚШда бўлиб ўтган “Энг илғор жангчи — 2023” мусобақасида ғолиб бўлди, деб хабар бермоқда вазирлик матбуот хизмати.

Маълум бўлишича, 17—24 март кунлари АҚШнинг Миссисипи штати, Camp Shelby ҳарбий ўқув базасида ўтказилган ушбу мусобақада кичик сержантлар — Анвар Турсунов ва Азамат Кенжаев АҚШ Миллий гвардиясининг Maxсус бўлинмалари ҳарбий хизматчилари билан куч синашди.

Мусобақа давомида ҳарбий хизматчилар якка таркибда жисмоний тайёргарлик синовлари (6 та машқни ўз ичига олган Фитнес тест), жисмоний ва руҳий зўриқиш йўлагидан ўтиш, тунда 15 километр масофага ориентирлаш, 15 кило юк билан 20 километр масофага марш югуриш, жанговар ва умумий тайёргарлик бўйича тест синовлари, иншо ёзиш (ҳарбий ҳамкорлик мавзусида 500 тадан кам бўлмаган сўз), артиллерия оловини бошқариш, АҚШ намунасидаги ўқотар қуролларни нотўлиқ қисмларга ёйиш, йиғиш ва жанговар ҳолатга келтириш, шунингдек, улардан турли усул ва шароитларда ўқ отиш, тиббий тайёргарлик, оммавий қирғин қуролларидан ҳимояланиш, кутилмаган машқлар каби шартларни муваффақиятли бажарди.

Ўзбекистонлик ҳарбий хизматчилар 15 килограмм юк билан 20 км масофага марш югуриш шартини 1 соат 54 дақиқа ичида бажариб  мусобақа рекордини янгилади.

Ушбу мусобақа халқаро ҳарбий ҳамкорлик алоқаларини мустаҳкамлаш ва махсус бўлинмаларда хизмат қилиш нуфузини ошириш каби мақсадларда ташкил этилган.

Ғолиб ҳарбий хизматчилар Тошкентда тантанали равишда кутиб олинган.