Ўзбекистон бўйича 17–21 апрель кунларига об-ҳаво прогнози эълон қилинди.

Унга кўра, 17–18 апрель кунлари Ўзбекистон ҳудудининг катта қисмида қуруқ, лекин салқин об-ҳаво бўлиши кутилмоқда. Фақат Фарғона водийси вилоятлари ва Сурхондарё вилоятида баъзи жойларда ёмғир ёғади, момақалдироқ бўлиши мумкин. Айрим жойларда дўл ёғиши эҳтимоли бор.

Чўл ҳудудлари ва Фарғона водийсида шамол тезлиги 17-22 метр/секундгача кучайиши, баъзи жойларда чанг тўзон билан кузатилиши кутилмоқда. Кундузги ҳарорат 12-15 даража, республика шимолида 7-12 даража илиқ атрофида бўлади. Кечаси ҳарорат пасайиб, 2-7 даража илиқ, шимолда баъзи жойларда 3 даража совуқ бўлади.

19 апрелдан бошлаб антициклон республика ҳудудидан чекина бошлайди ва иш ҳафтасининг охиригача Ўзбекистон бўйича қуруқ об-ҳаво кузатилади. Ҳаво ҳарорати аста-секин кўтарилади ва 21 апрелга келиб кечаси 4-9 даража илиқни, кундузи 20-25 даражани ташкил этади.

17 апрель куни сел-сув тошқин ҳодисалари юзага келиши мумкин.

Тошкентда ёғингарчилик кутилмайди. Шамол 5-10 м/с тезликда эсади. 17–18 апрель кунлари ҳаво ҳарорати 12-15 даража атрофида бўлади. Душанбадан сешанбага ўтар кечаси ҳарорат 2-4 даража илиққача пасаяди.

19 апрелдан иш ҳафтасининг охиригача кечалари ҳарорат 4-7 даража илиқ атрофида бўлади, кундузи аста-секин кўтарилади ва жума кунига келиб ҳарорат 20-23 даражагача кўтарилади.