Андижон вилояти ҳокими Шуҳрат Абдураҳмонов лавозимидан озод этилди

Андижон вилояти ҳокими Шуҳрат Абдураҳмонов президент топшириғига асосан лавозимидан озод этилди. Бу ҳақда “Дарё” манбаси маълум қилди.

Унга кўра, Андижон вилояти ҳокими Шуҳрат Абдураҳмонов билан бирга барча вилоят раҳбарлари президент топшириғига биноан чақиртирилган, вилоят ҳокими гувоҳномаси олинган. Андижон вилоят ҳокими вазифасини бажарувчи этиб вилоят ҳокимининг биринчи ўринбосари, иқтисодий тараққиёт ва камбағалликни қисқартириш бошқармаси бошлиғи Дилшод Каримов Абдумаликович тайинланган.

Маълумот учун, Андижон вилояти собиқ ҳокими Шуҳрат Абдураҳмонов 2022 йил 1 август куни ўтказган ҳокимлик соатида Дилшодбек Каримовни ўзининг биринчи ўринбосари сифатида таништирган эди.

Дилшодбек Каримов 1980 йилда Қўрғонтепа туманида туғилган бўлиб, 2005 йилда Андижон муҳандислик иқтисодиёт институтини, 2014 йилда Ўзбекистон Республикаси президенти ҳузуридаги Давлат бошқаруви академиясини тугатган.

Иш фаолиятини 2001 йилда Қўрғонтепа тумани халқ таълими бўлими ўқув услубиёт хонаси компьютер-оператори вазифасидан бошлаган. 2002—2021 йилларда Қўрғонтепа тумани “Бунёдкор” кичик корхонаси ҳисобчиси, туман иқтисодиёт бўлими 2-тоифали мутахассиси, бош мутахассиси, бўлими бошлиғи, Қўрғонтепа тумани ҳокимининг иқтисодиёт ва ижтимоий ривожлантириш масалалари бўйича ўринбосари, хизмат кўрсатиш соҳаси ва тадбиркорлик масалалари бўйича ўринбосари, Қўрғонтепа тумани ҳокимининг биринчи ўринбосари—Қорасув шаҳар ҳокими, Иқтисодиёт вазирлиги ҳудудларни ривожлантириш дастурларни мониторинг қилиш бўлими бош мутахассиси лавозимларида ишлаган.

Шуҳрат Абдураҳмонов 2020 йил 13 январь куни бўлиб ўтган барча сиёсий партиялардан Халқ депутатлари Андижон вилоят кенгашига сайланган депутатларнинг биринчи сессиясида Андижон вилояти ҳокими этиб қайтадан сайланган эди.