ЕХҲТнинг 24 нафар эксперти Ўзбекистондаги референдум жараёнларини кузатиб боради
Европада хавфсизлик ва ҳамкорлик ташкилоти Демократик институтлар ва инсон ҳуқуқлари бўйича бюроси Ўзбекистондаги конституцион референдум жараёнларини кузатиш учун 10 нафар экспертдан иборат миссия юборди. Бу ҳақда 28 март куни Тошкент шаҳрида бўлиб ўтган матбуот анжуманида миссия раҳбари Алберт Йонсон айтиб ўтди, деб хабар бермоқда “Дарё” мухбири.
Тадбирда айтилишича, чекланган миссия Ўзбекистон ҳукуматининг расмий таклифига биноан етиб келган. Бу идоранинг мамлакатдаги 10-мониторинг миссияси бўлади.
“Биз ташриф давомида турли давлат идоралари, ҳукумат мутасаддилари, сиёсий партиялар, шунингдек, фуқаролик жамияти аъзолари билан учрашишни ният қилганмиз”, — деди миссия раҳбари Алберт Йонсон.
Унинг айтишича, миссиянинг асосий гуруҳи 10 нафар халқаро экспертдан иборат. Улар ЕХҲТнинг турли иштирокчи давлатларидан тайинланган аъзолар ҳисобланади.
“Бизнинг жамоамизда сайловлар бўйича мутахассислар, сиёсий, ҳуқуқий ва медиа таҳлилчилари бор. Энг муҳими, медиа мониторинг бўйича масъуллар мавжуд бўлиб, улар кейинчалик маҳаллий экспертлардан иборат жамоа тузиб, медиа мониторингга бошчилик қилади”, — деди миссия раҳбари.
Шунингдек, 3 апрелдан бошлаб яна 14 нафар узоқ муддатли кузатувчилар етиб келади. Улар тегишли кўрсатма олганидан сўнг Ўзбекистондаги 14 та ҳудудий бирлик — Тошкент шаҳри, Қорақалпоғистон ва 12 та вилоятга юборилади.
“Бизнинг бюро ЕХҲТдаги 57 давлатда бўлиб ўтган 400 дан ортиқ сайлов жараёнларида иштирок этган. Биз, биринчи навбатда, сайлов ва референдумга тайёргарлик жараёнларини, шунингдек, сайловчиларни рўйхатга олиш масалаларини, сайлов кампанияларини, уларни молиялаштириш масалаларини ўрганамиз. Бундан ташқари, мамлакатдаги сайлов ва референдумга оид норматив-ҳуқуқий асосни ҳам кўриб чиқамиз”, — дейди Алберт Йонсон.
Миссия раҳбарининг таъкидлашича, референдум тугаганидан бир кун ўтиб ташкилот илк баёнотини тақдим этади. Аммо якуний ҳисобот жараён тугагач, тахминан, икки ойдан сўнг эълон қилинади. Ушбу якуний ҳисоботда мамлакат учун тавсиялар ҳам берилади.
Жамоа жараён тугаганидан сўнг ҳам мамлакатда қолишда давом этади, бу вақт давомида референдум жараёни ва натижалари бўйича билдириладиган шикоятларни кузатади.
“Бизнинг миссиямиз бу — кузатиш миссияси. Ҳар қандай аралашувлардан ҳоли ишлаймиз. Бизнинг вазифамиз фақат кузатиб, шу кузатув натижалари бўйича ҳисобот бериш холос. Мақсадимиз Ўзбекистон ЕХҲТ доирасида ўз зиммасига олган мажбуриятларни қанчалик амалга ошираётганини баҳолаш ҳисобланади. Бундан ташқари, мамлакат халқаро стандартларга қанчалик мослиги, қонунчилик талабларига қандай риоя қилганини ўрганамиз”, — дея қўшимча қилди Алберт Йонсон.
