Ижтимоий тармоқларда картадан картага (P2P) пул ўтказмалари учун солиқ жорий этилгани ҳақида хабарлар юзасидан Солиқ қўмитаси расмий муносабат билдирди. Бу ҳақда “Дарё”га қўмита матбуот хизматидан маълум бўлди.
Маълумотларга кўра, жисмоний шахсларнинг бошқа жисмоний шахсдан мерос ёки ҳадя тартибида, шунингдек, текинга олган пул шаклидаги даромадлари солиққа тортилмайди.
Яъни бир жисмоний шахсдан бошқа жисмоний шахсга пул ўтказиш (P2P) операциялари солиққа тортилмайди.
Аввалроқ Солиқ қўмитаси ва банк вакиллари билан P2P ўтказмалари учун ҳисобварақ-фактура расмийлаштириш масалалари муҳокама қилинган эди.
2023 йил 1 майдан жисмоний шахслар ўртасида пул ўтказмаларини амалга оширувчи ташкилотлар кўрсатилган хизматлар учун комиссия олинишидан қатъи назар, электрон ҳисобварақ-фактурани расмийлаштиришлари ва тақдим этишлари белгиланган.
Учрашув ахборот алмашинувини тартибга солиш ва техник интеграцияни соддалаштириш мақсадида ташкил этилди.
Учрашувда жисмоний шахсдан жисмоний шахсга пул маблағлари ўтказилганда солиқ муносабатлари юзага келмаслиги ва жисмоний шахсларда солиқ тўлаш мажбуриятлари пайдо бўлишидан хавотирланиш асоссиз эканлиги таъкидланди.
Изоҳ (0)