Макроиқтисодий ва ҳудудий тадқиқотлар институти (МҲТИ) экспертлари томонидан Ўзбекистонда 2017—2022 йилларда суғурта фаолиятини ривожлантириш борасида амалга оширилган ислоҳотларнинг натижалари таҳлил қилинди.

Суғурта хўжалик юритувчи субъектлар ва аҳолини турли хавф-хатарлар ва кутилмаган вазиятлардан ҳимоя қилишни таъминлашнинг самарали воситаларидан бири.

Кейинги йилларда бу соҳада амалга оширилган ислоҳотлар туфайли қуйидаги натижаларга эришилди:

Жумладан соҳанинг ҳуқуқий асослари мустаҳкамланди, “Суғурта фаолияти тўғрисида”ги Ўзбекистон Республикаси қонунига ўзгартиш ва қўшимчалар киритилди, рақобатбардош суғурта бозорини ривожлантириш ва ўзгартиришга қаратилган бир қатор меъёрий-ҳуқуқий ҳужжатлар қабул қилинди.

Ҳуқуқий асоснинг мустаҳкамланиши натижасида соҳани янада ривожлантириш, шунингдек, истеъмолчиларнинг ҳуқуқий ва қонуний манфаатларини ҳимоя қилиш учун қулай шарт-шароитлар яратилди.

2017 йилда Ўзбекистонда 27 та суғурта компанияси фаолият олиб борган бўлса, 2022 йилда уларнинг сони 51,8 фоизга ошиб, 41 тага етди, шунингдек, 30 дан ортиқ тегишли хизматларни кўрсатувчи тадбиркорлик субъектлари фаолият юритяпти.

2022 йилда суғурта компаниялари устав капитали 2017 йилдагига нисбатан 5,8 баравар ўсиб, 1,88 триллион сўмни ташкил қилди.

Суғурта полислари сони 1,4 баравар ўсиб, 8,4 миллионтага етди ва шартномалар асосан фойдаланувчи учун қулай электрон шаклга ўтказилди.

2022 йилда мижозлар учун суғурта тўловларининг умумий миқдори 2,6 триллион сўмни ташкил қилди ва бу 2017 йилдагига нисбатан 9,6 баравар кўп дегани.

Ҳудудлардаги таркибий тузилмалар сони 2017 йилдагига нисбатан 1,5 баравар ошди ва деярли 2 мингтага етди.

Барча ҳудудларда 15,4 минг нафар ходим ва суғурта агенти учун барқарор иш ўрни яратилди.

Шунингдек, Ўзбекистондаги суғурта компаниялари турли йўналишларда 110 дан ортиқ турдаги суғурта маҳсулотларини таклиф этяпти.

Замонавий ахборот технологияларини кенг жорий этиш, суғурта бозорини рақамлаштириш, истеъмолчилар ишончини, шунингдек, суғурта маданияти даражасини ошириш, миллий суғурта бозорини халқаро стандартларга изчил мувофиқлаштириш соҳада самарадорликнинг ошишига олиб келади.

Шу билан бирга, ҳудудларда янги иш ўринлари ташкил этилиши, бозорда рақобат даражаси ва бизнес юритиш ишончлилигининг ошиши ҳисобига нафақат суғурта хизматлари соҳаси, балки турдош тармоқлар ҳам янада ривожланади, турли соҳаларга инвестиция киритиш имкониятлари кенгаяди.