Ijtimoiy tarmoqlarda kartadan kartaga (P2P) pul o‘tkazmalari uchun soliq joriy etilgani haqida xabarlar yuzasidan Soliq qo‘mitasi rasmiy munosabat bildirdi. Bu haqda “Daryo”ga qo‘mita matbuot xizmatidan ma’lum bo‘ldi.
Ma’lumotlarga ko‘ra, jismoniy shaxslarning boshqa jismoniy shaxsdan meros yoki hadya tartibida, shuningdek, tekinga olgan pul shaklidagi daromadlari soliqqa tortilmaydi.
Ya’ni bir jismoniy shaxsdan boshqa jismoniy shaxsga pul o‘tkazish (P2P) operatsiyalari soliqqa tortilmaydi.
Avvalroq Soliq qo‘mitasi va bank vakillari bilan P2P o‘tkazmalari uchun hisobvaraq-faktura rasmiylashtirish masalalari muhokama qilingan edi.
2023-yil 1-maydan jismoniy shaxslar o‘rtasida pul o‘tkazmalarini amalga oshiruvchi tashkilotlar ko‘rsatilgan xizmatlar uchun komissiya olinishidan qat’i nazar, elektron hisobvaraq-fakturani rasmiylashtirishlari va taqdim etishlari belgilangan.
Uchrashuv axborot almashinuvini tartibga solish va texnik integratsiyani soddalashtirish maqsadida tashkil etildi.
Uchrashuvda jismoniy shaxsdan jismoniy shaxsga pul mablag‘lari o‘tkazilganda soliq munosabatlari yuzaga kelmasligi va jismoniy shaxslarda soliq to‘lash majburiyatlari paydo bo‘lishidan xavotirlanish asossiz ekanligi ta’kidlandi.
Izoh (0)